Howard Deri ngangkatka nama S’wak ngarika Malaysia ba AYE 2017

Utusan Borneo (Sarawak) - - Berita Iban -

KUCHING: Pemain sape Sarawak Howard Deri, 20, ngarika Malaysia ba Program ASEAN Youth Ensemble ( AYE) 2017 ke diatur di Bangkok, Thailand.

Program berengkah 25 Ogos nyentuk 2 Sept 2017 nya diatur enggau tuju ngelaku kerejasama entara pemuzik ari raban nembiak di Asia Tenggara.

Kelimpah ari nya, program mega dikearap ulih meransang raban orang ke landik dalam muzik nyengkaum komposer ngadu pansik ba sentang muzik tradisional.

Program ku Howard, meri awak ngagai iya mandang sereta ngelaku muzik sape ngagai menua luar.

“Seiti awak ke manah endur ngelaku sape sereta begulai enggau pemain muzik tradisional ari menua bukai,” ku iya ke mega seiku nembiak ari Universiti Malaysia Sarawak (Unimas).

Iya madah penyereta dipilih bepelasarka penau ba pekara muzik lalu landik nebah perengka muzik tradisional.

Ba aum pengarang berita ke diatur kena 29 Ogos, Howard madah sida dipinta mantaika tebah muzik tradisional chara beraban ke diiring enggau sekeda lagu.

Raban pemuzik ari Asia Tenggara tu bisi mantaika muzik diri ba Balai Muzik Princess Galyani Vadhana Institute of Music (PGVIM) kena 1 September enggau di Siam Square, Bangkok kena 2 September beserimbai enggau Bangkok Art Festival.

Kelimpah ari Howard, Malaysia mega diarika Hallan Hashim, seiku pemain sape ari Sada Borneo enggau seiku komposer (pengelicha) ari Universiti Malaysia Sabah, Lee Chie Tsang.

Rambau program nya, simposium mega bisi diatur ke alai raban pemuzik (nembiak) enggau komposer ari menua ASEAN bisi ngadu randau enggau nembiak ari PGVIM.

Program mega dirichah raban ari Yong Siew Toh Conservatory of Music, Seoul National University enggau Ensemble Muzik Fabrik ari Cologne, German.

AYE 2017 nerima sukung ari ASEAN Cultural Fund lalu diatur Opis Menteri Main Asal Thailand nengah kerejasama PGVIM.

MANTAIKA PENGELANDIK: Howard (kanan) enggau Hallan mantaika tebah sape rambau Bangkok Art Festival di Siam Square.

Newspapers in Malay

Newspapers from Malaysia

© PressReader. All rights reserved.