SPNB nerima lebih 4,000 peminta ngaga RMR1M

KUCHING: Syarikat Perumahan Negara Berhad ( SPNB) nerima lebih ari 4,000 peminta ba pengawa ngaga Rumah Mesra Rakyat 1Malaysia ( RMR1M) ari Sarawak.

Ari penyampau nya, bisi 1,739 peminta dikemendarka ke alai 986 unit udah tembu, 162 unit benung digaga enggau 591 unit agi dalam proses dokumen sempekat.

Menteri Pengeraja Asal enggau Rampa Menua, Dato Sri Dr Wan Junaidi Tuanku Jaafar madahka peminta pemadu mayuh diterima ari Parlimen Santubong, iya nya sepenyampau 854 iti.

Ari penyampau nya, bisi 174 peminta enda diterima SPNB enggau ketegal udah bisi rumah kediri empu sereta penatai pemisi lebih ari RM3,000 sebulan.

“Perintah nengah SPNB deka ngemayuhka agi pengawa ngaga RMR laban program ngaga rumah tu seiti pekara ti dikemeratka ari baruh iring Menteri Besai Datuk Seri Najib Tun Razak.

“Pia mega di Sarawak tu, aku arap bendar Kepala Menteri Datuk Patinggi Abang Johari tun Openg mega beratka pekara tu,” ku iya.

Iya mansutka pekara nya lebuh bejaku ba ‘Majlis Penyampaian Indent Kerja dan Sijil Subsidi SPNB’ di Balai Mayuhguna, Palan Servis Parlimen Santubong, Jalan Kulas ditu, ensanus.

Dulu ari nya, Pemesai Pengerembai Kaul SPNB Sarawak, Wan Habeeb Wan Yep Mohdzar madahka Parlimen Santubong pemadu aktif tauka mayuh minta RMR1M.

Ku iya, ari 854 peminta ke diterima, sepenyampau 281 unit udah digaga lalu 74 unit agi udah dikemendarka ba taun tu.

Kemari ku iya, bisi 15 unit unit RMR ba kandang menua Santubong disuaka perintah besai nengah SPNB ngagai piak kunteriktor ngambika ngaga enggau nembuka dalam timpuh tiga bulan.

“Perintah nyendiaka subsidi sepenyampau RM480,000 dikena ngaga 15 unit RMR tu iya nya RM300,000 subsidi ngaga enggau RM180,000 agi subsidi kadar faedah.

“Rumah ti deka digaga tu bisi pemesai 700 kaki persegi, tiga bilik tinduk, dua bilik ai, seiti bilik besai enggau seiti dapur ke chukup landang endur pengempu nya,” ku iya.

Program RMR1M ditumbuhka dikena mantu raban penatai pemisi baruh baka orang berikan, orang bumai bekebun enggau ruang bilik seranta ke nadai ngembuan rumah ke diri empu tauka ke diau ba rumah ke udah kelalu jai tang bisi tanah endur ngaga rumah diri empu ke lantang endur diau.

Ba pengerami nya kemari, Junaidi ti mega Kaban Parlimen Santubong bisi nyuaka ungkup belanja sepenyampau RM20,000 ngagai Masjid Darul Solihin, Telaga Air.