Chara S’wak mutar penanggul SKM deka nyadi chunto

KUCHING: Perintah besai nengah Opis Menteri Pelajar Malaysia (KPM) deka nitihka chara perintah Sarawak mutarka penanggul sekula kurang nembiak (SKM) di nengeri tu.

Ketuai Direktor Opis Pelajar Malaysia, Tan Sri Dr. Khair Mohamad Yusof madah, nya berindik ari opis menteri pelajar nengeri tu ke udah numbuhka makmal dikena nentuka chara engkeman betapi enggau penanggul nya.

“Aku ngasaika bepelasarka aum sebedau tu, deka nitihka chunto Perintah Sarawak ti udah bejalaika sebengkah makmal dikena meda baka ni chara sida ulih mantu SKM.

“Kitai deka meda sekalika digempung tauka baka ni, laban sida bisi program ungkup nya. Tang ke pemadu beguna iya nya baka ni sida ulih nempa kerejasama enggau mayuh piak, ngambika sama setuju,” ku iya.

Khair mansutka pekara nya lebuh dikerandau raban pengarang berita bekaul enggau pemutus pemadu baru bekaul enggau SKM di nengeri tu.

Dulu ari nya iya bejadika program ‘ Jelajah Pendidikan KPM 2017’ Sarawak ke diatur ba Plaza Merdeka ditu, kemari.

Berebak enggau tu lebuh ditanya sekalika pengawa mutarka SKM nya deka dipejalaika sereta enggau pakej belanja dikena mutarka isu sekula jai di nengeri tu, iya madah naka ke diatu bedau bisi pemutus bekaul enggau pekara nya.

“Tang ke pemadu beguna iya nya pakej ke digaga ungkup sekula rusak nya mega enda tau enda mungkur tauka beratka SKM.

“Sekula rusak nya endang digaga sereta kitai mega beratka baka ni ulih mutarka SKM nyengkaum ke diserangkaung dalam kategori sekula rusak,” ku iya.

Di Sarawak, bisi 651 SKM enggau penyampau nembiak kurang ari 150 iku lalu tebal agi sekual di menua pesisir.

Lalu di Sarawak bisi 1,020 buah sekula dalam kategori rusak ti sereta dibagi ngagai tiga kategori iya nya kategori tiga bisi 415, kategori rusak dua iya nya bisi 210 buah enggau kategori rusak satu bisi 395 buah.