Siku lelaki bebadi nyawa belantak ba KM 24 Jalai Kabong/Roban

Utusan Borneo (Sarawak) - - Berita Iban -

SARATOK: Siku lelaki bebadi nyawa, lalu orang ke nepan iya, siku indu beumur 20 taun raya bakal pengudah motosikal ke ditepan seduai iya belantak enggau sebuah kerita, lemai ensanus.

Penusah bebadi tu nyadi urung pukul 4.30 lemai, bepalan ba Kilometer 24 Jalai Kabong/Roban, iya nya ngerimbai Sungai Pasir.

Ketuai Polis Pelilih (KPD) Saratok, DSP Mordani Tanin madah, orang ke bebadi nyawa tu Satu Lidang, 50, udah nya indu ke bakal Kadi Ajun.

“Seduai iya bela peranak Rumah Langan, Ulu Sebetan, ditu.

“Maya penusah nyadi, seduai bela baru pulai ngabas kaban belayan ke ditinggang penusah rabat ba sebengkah rumah panjai di menua Alit, ditu.

“Bepelasarka pansik tumu, maya ba rantau jalai pulai ari rumah panjai nya nuju Roban, enda mukai-mukai motosikal ke ditepan seduai iya belantak enggau kerita ke datai ari mua,” ku Mordani madah ngagai media, kemari.

Maya penusah nyadi, lelaki ke bebadi nyawa nya labuh lalu tepelanting ngujungka iya balat bakal ba pala enggau patah kaki kanan.

Pemalat bakal ba dalam tubuh ngujungka lelaki nya bebadi nyawa ba palan penusah nyadi, udah nya orang ke nepan udah dibai berubat ngagai Sepital Sarikei.

Berebak enggau nya, deriba kerita nadai sebarang bakal.

Maya penusah nyadi mega kerita enggau motosikal ke belantak nya bela bepusin sebedau ensayar ke parit.

Lelaki ke babadi nyawa nya udah dibai ngagai Sepital Seratok, seraya nganti sida sebilik ngambi.

Nitihku Mordani, kes tu udah dipansik nitihka Seksyen 41(1) Akta Pengangkutan Jalan (APJ) 1987. BINTANGOR: Urung 15 kaban Usahanita Amanah Iktiar Malaysia (AIM) ari Rumah Labang, Sungai Tulai Bintangor nerima bantu ari Turu Pengintu Pengelantang Pendiau AIM, ensanus.

Sekretari Politik Kepala Menteri Teng Ung Woo madah, semua penerima bantu nya endang sida ke kala tasah angus ba Rumah Labang, Sungai Tulai Bintangor kena bulan Julai tu tadi.

“Genap sida bela nerima bantu RM5,000. Nya alai, sehari tu ( ensanus), Turu Pengintu Pengelantang Pendiau AIM bisi ngungkupka RM75,000 ngagai kaban iya.

“Kitai ngarap nengah pemeri tu, iya ulih ngelempungka tating penusah ke ditapi kaban AIM ke tasah angus,” ku iya.

Program nyuaka pemeri tu diatur ba laman Rumah Labang, Sungai Tulai Bintangor.

Bela bisi datai Sekretari Politik Kepala Menteri Soo Li Ching ngarika Kaban Kunsil Nengeri (ADUN) Meradong Ding Kuong Hiing, Sekretari Politik Kepala Menteri Daniel Bujal, Chairman Usahanita Sarikei Dayang Salamah, Menijar AIM Abdul Hafiq Soni enggau Tuai Rumah Labang.

Newspapers in Malay

Newspapers from Malaysia

© PressReader. All rights reserved.