Semaya TPM deka lengkas mutarka penanggul sekula rusak disukung

Endang patut laban penanggul nya udah lama, suah dikenataika ngagai KPM

Utusan Borneo (Sarawak) - - Berita Iban - Dikarang Rengenyan Labang

KUCHING: Pengawa enggau semaya Sapit Menteri Besai Datuk Seri Dr Ahmad Zahid Hamidi ke deka lengkas mutarka penanggul sekula rusak di Sarawak, nerima sukung penuh ari Kesatuan Guru Bumiputera Sarawak (KGBS).

Presiden KGBS, Ahmad Malie madahka pekara nya endang patut berindik ari penanggul nya ti udah lama sereta suah dikenataika ngagai Opis Menteri Pelajar Malaysia (KPM).

Iya ti ngarika gerempung nya ngarapka udah tu atur pengawa nya amat bejalai enggau lanchar sereta ulih nyadi nyata.

“KGBS nyukung penuh pengawa sereta semaya YAB Sapit Menteri Besai Datuk Seri Dr Ahmad Zahid ti deka mutarka penanggul sekula rusak di Sarawak enggau jampat.

“Kebuah KGBS madahka diri amat nyukung tu laban penanggul sekula rusak di Sarawak udah lama sereta suah dikenataika ngagai KPM sebedau tu, tang atur mutarka penanggul nya bisi lubah mimit taja pan bisi ungkup ungkup belanja udah dikemendarka dalam bajet sebedau tu, dikena ngemanahka sekula rusak nya.

“Ba penemu KGBS, semaya enggau penerang ti dibantaika nya patut disempulang enggau timpuh ke udah ditetap lalu dipadah ngagai mensia mayuh dikena ngenukuka semaya nya dikeamatka,” ku iya lebuh ditanya Utusan Borneo.

Ahmad meri penerang iya lebuh dipinta meri saut bekaul enggau penerang ke dibantaika Sapit Menteri Besai nya ti besemaya deka neruska pengawa ngemanah tauka ngaga baru sekula ke udah rusak di Sarawak.

Ngenang pekara nya baru, KGBS bepenemu enti nadai dipadah sereta ditetapka timpuh nya dipejalaika, ulih disema baka semaya aja lalu pengujung iya rayat nganti projek ke udah dipadahka tang nadai nyadi.

“Nya alai KGBS ngasai sereta netapka udah datai ba maya iya tetiap semaya enggau pekara ti bekaul ke udah dipadah, patut dikeamatka enggau lengkas ke pemaik enggau pengelantang semua piak kelebih agi bala nembiak ke nyadi klien ba sekula ke udah rusak sereta patut dikemanahka,” ku iya.

Apin lama di Sibu, Ahmad Zahid meri perambu pakej belanja dikena mutarka isu sekularusak di nengeri tu seraya madahka semina urung 29.8 peratus ari penyampau semua sekula di Sarawak dalam kategori datai ba tikas lantang tauka likun endur belajar lalu ke laluh iya ba tikas sekula rusak.

“Seiti ari chara mutarka sekula jai di nengeri tu iya nya nengah pakej belanja. Nya alai perintah deka terus mekuh sereta meri komitmen tinggi ngemansangka baru semua sekula rusak Sarawak ke nyadi seiti agenda besai menua,” ku Zahid, di Sibu apin lama.

Penyampau semua sekula di Sarawak bisi 1,454 buah lalu ari penyampau nya 1,020 sekula dalam tiga kategori rusak ti nyengkaum sekula jai kategori tiga bisi 415, sekula rusak kategori dua (210) enggau sekula daif kategori satu bisi 395 buah.

Nitihku Zahid, kategori tiga ba tikas lebih ari 75 peratus rusak lalu tebal agi udah manggai lebih 70 taun sereta deka dulu diganti enggau dikemanah.

Kategori dua ku iya, sekula ba tikas kurang ari 70 peratus sereta begunan nya urung 40 taun sereta patut dikemanahka sereta ketegori satu iya nya sekula ti ba tikas diguna urung 70 peratus.

Dikena mutarka isu nya Zahid madahka, perintah besai nengah Langgur Pemansang Malaysia Lumpar Ke- 11 ( RMK11) udah ngemendarka 30 projek pemansang baru sekula ti dipejalaika di nengeri tu.

Kebuah KGBS madahka diri amat nyukung tu laban penanggul sekula rusak di Sarawak udah lama sereta suah dikenataika ngagai KPM sebedau tu, tang atur mutarka penanggul nya bisi lubah mimit taja pan bisi ungkup ungkup belanja udah dikemendarka dalam bajet sebedau tu, dikena ngemanahka sekula rusak nya. Ahmad Malie Presiden KGBS

AHMAD

Newspapers in Malay

Newspapers from Malaysia

© PressReader. All rights reserved.