Jalil bekunsika peneleba enggau tim Kuching FA
KUCHING: Ex- pemain enggau jurulatih Sarawak, Abdul Jalil Rambli meri peransang ngagai tim main bol Kuching FA ke deka bepekit ngerebut Piala FAM 2017 ngelaban UKM FC kena 19 September tu ba Stadium Negeri, Petra Jaya.
Jalil dikangau khas terebai ari Kuala Lumpur awak bekunsika pengelandik enggau peneleba begulai enggau tim tu nengah sebengkah program latih pengelama sejam ba Padang C kemari.
Maya dirandau, Jalil meri pengaga ati ngagai Menijar Kuching FA, Fazzrudin Abdul Rahman laban udah ngangauka iya bekunsika penemu enggai tim nya.
“Aku enda tekenyit lebuh nemu Kuching FA mujur nyingkang ngagai pekit ngerebut Piala FAM. Tang, aku ngarap Kuching FA enda ngetu naka tu aja laban kitai patut nguji meri bekau.
“Ba ASTRO, aku suah ngaga pansik bekaul enggau mayuh tim lalu kitai ba Sarawak ngembuan mayuh pemain ke bepenau, penanggul iya sida nadai peluang lebuh kitai kitai udah datai ba tikas ke udah tinggi,” ku iya.
Jalil mega bekunsi pengaga ati enggau pemujur Kuching FA ke udah nyingkang ngagai pekit ngerebut Piala FAM seraya madah pelasar ke pemadu manah endur tim tu nempa pemujur ke lebih besai.
Iya pechaya Kuching FA ulih nyingkang jauh agi lalu nya udah dipandangka sida nengah pemujur nyadi champion pekit Liga Main Bol Rayat ( LBR) edisi keterubah.
Ngelansa pasal main besatup enggau UKM FC, Jalil ngelalau bala pemain Kuching FA patut ngena enggau manah pengelebih bemain ba palan diri empu endur ngulihka pemujur.
“UKM FC mega ngeri bemain ba Kuching. Naka ulih ngulihka pemujur ba main tu ditu, udah nya baru ngerunding main ti kedua,” ku iya.
Jalil diatu ke gawa ba ASTRO kala ngiring tim Sarawak.
Berebak enggau nya, Fazzrudin ke bela datai ba program nya meri terima kasih ngagai Jalil laban udah bekunsi penemu enggau peneleba ngagai tim iya.
“Baka ke udah dipadah aku suba, dikena Kuching FA nyingkang lebih jauh, kitai begunaka sukung ari semua piak baik nya ari jurulatih, ex-pemain Sarawak lebih agi peminat- peminat main bol ba Kuching awak meri sukung ngagai bala pemain.
“Nya kebuah, kitai ngangauka jurulatih Jalil meri peransang ke pemaik bala pemain Kuching FA,” ku iya.
ADUN Tupong nya madah, piak sida begunaka saup Jalil beratika pengurang ba tim tu seraya ngarapka penemu dikembuan jurulatih tu ulih ngenegapka pemujur Kuching FA.
Nitihku iya, Kuching FA deka terus begunaka penemu Jalil seagi tim tu bepekit ngerebut Piala FAM.
“Aku mea deka nesau semua peminat di Kuching datai sampal meri sukung ngagai tim tu laban kitai deka nempa siti sejarah baru pengudah kitai mujur nyingkang ngerebut Piala FAM,” ku tandu iya.