PPD: Orang ti ngereja penyalah beleman mali patut dijil seumur idup
SIBU: Agi pedis ati ngenang kes beleman mali ti majak nyadi, baka orang bukai Serakup Dayak Dudong (PDD) mega mejah amat penyalah baka nya lalu ngasaika ukum ke diletak ba penyalah nya sebedau tu enda engkeman agi.
Beambika chunto siti kes empai lama, presiden serakup tu, Julius Enchana madah, aki ti masung uchu endang udah bisi rekod penyalah ke sebaka, ba taun 2008, sereta kala dijil sepengelama 12 taun enggau lima kali lunsin.
Aki ti masung tu baru dipansut ari jil ba taun 2016 nyin kemari.
“Arinya, ukum tu dipeda enda chukup sereta enda teubah ke ulah enda menuku iya (enti ditemu salah). Tambah mega, ba kes sekali tu ukai semina iya, tang aya nembiak nya mega nyadi suspek masung,” pia ku Julius maya ngelansa kes nya ba pengarang berita, kemari.
Berindik arinya ku iya, ukum jil seumur idup patut diletak ba seduai tu enti ditemu ngereja penyalah nya.
Tang taja pan baka nya, Julius madah, perambu undang undang meriri ke dipansutka Datuk Fatimah Abdullah apin lama tu tadi nyangka enda entu engkeman dikena kemaya hari tu.
“Perambu undang-undang meriri penyalah masung nyangka enda entu engkeman dikena kemaya hari tu, laban tu menyati mensia.
“Tang ukum jil seumur idup lebih agi engkeman dikena ngajar sida ke ngereja penyalah,” ku iya.
Nambahka jaku iya, Julius madah, nyema agi ngena ukum sebedau tu, sida ti udah abis timpuh jil enda tau dipegulai enggau mensia mayuh tang patut diengkah ba endur kediri, nyentuk ulah jai sida ditentuka amat enda dikereja agi.
Ba pekara bukai, PDD mega minta agensi perintah ti bekaul patut lebih mayuh agi ngaga program licha ungkup apai indai dikena nagang sereta nyeliah ke penyalah tu majak nyadi.