Tuduh ngumbai ekonomi Malaysia majak labuh enda amat, ku Tan Kai

KUCHING: Sekretari Politik ngagai Kepala Menteri, Tan Kai ngelalau peranak nengeri tu seruran ngembuan runding ke positif.

Bejaku ba pengerami Jalinan Kasih P196 Stampin ke diatur Opis Pemadah Pelilih Kuching ditu kemari, iya madah tuduh sentang gaya ekonomi Malaysia ti majak labuh enda amat.

“Berunding positif, Malaysia enda baka tuduh raban penyakal ti madah menua kitai deka bankrap.

“Tuduh ke baka tu suah dipeda kitai ayan ba media rama lalu anang sekali pechaya,’ku iya.

Ba pengerami ke digulu raban ketuai pupu bansa nya, Tan Kai mega ngelalau peranak nengeri tu nyukung parti politik asal ari nengeri tu ba Pengawa Bepilih Besai(GE14) ti deka datai.

Ku iya ke mega Ketuai Bagi Nembiak SUPP, peranak Sarawak meseti begempung lalu ngenataika sukung nadai bebagi ngagai parti politik asal nengeri tu.

‘Kitai meseti begempung, anang kiruhka pekara ke nyadi di Malaya tang sukung parti kitai empu.

“Semina parti asal ari nengeri tu aja ulih ngenan hak kitai. Parti ke datai ari Malaya(PKR enggau DAP) mendingka perintah ari Malaya,”ku iya.

Beserimbai enggau Hari Malaysia ke diintu kemari (ensanus), Tan Kai ngelalau semua ngambika besaup ngenanka pemaik kaul entara Sarawak enggau Malaya.

Iya madah gempung numbuhka Malaysia ba taun 1963 nya suba patut diintu enggau manah.

Bela datai Sapit Direktor Opis Pemadah Sarawak Ali Suhaili.