Perintah S’wak deka mantu ngemanah sebelas buah Tabika KEMAS: Fatimah
KUCHING: Perintah nengeri Sarawak nengah Opis Pengelantang Pendiau, Komuniti, Orang Indu, Ruang Bilik enggau Pemansang Anak Mit (KKKWKPK) deka mantu Opis Pemansang Komuniti ( KEMAS) dulu, ngaga tauka ngemanahka sebelas buah Tabika ke udah lama, udah jai, tauka rusak ke direjista ari baruh nama KEMAS, ngena belanja perintah nengeri Sarawak dulu.
Sebelas buah tabika nya, iya nya Tabika Rh Serit, Kapit, Rh Pillai, Kapit, Selangan, Sarikei, Rh Jamba, Kapit, Kpg sagah, Petra Jaya, Sg Malikat, Marudi, Manok Machal, Kapit, Spg Ampungan, Puncak Borneo enggau Kpg Sg Tapang, Stampin.
Menteri KKKWKPK Dato Sri Fatimah Abdullah madah ba sentang pelajar tumu anak mit berat lalu perintah enggau meda anak mit di menua tu belajar ba endur ke enda lantang.
“Di serata menua Sarawak kitai bisi urung 1,540 buah Tabika KEMAS enggau pemayuh anak mit, urung 21, 139 iku enggau 81 buah Taska KEMAS enggau pemayuh anak mit urung 1,168 orang.
“Ari penyampau nya, urung 109 buah tabika, udah lama sereta jai lalu enda tau enda digaga baru enggau jampat.
“Tang laban penyuntuk bajet, tabika lama tu bedau ulih dikemutar lalu ketegal nya, perintah nengeri ngambi inisiatif kediri empu, meri pemerat ngagai 11 buah tabika ke amat- amat jai tauka lama dulu,” ku iya.
Iya nandu baru madah- ka bantu ke Tabika KEMAS di menua Sarawak, nyadang perintah nengeri Sarawak ngaga tabika tu dulu, lalu udah nya, Perintah Besai nengah KEMAS patut mayar pulai baru ngagai perintah nengeri Sarawak.
“KEMAS di Sarawak minta perintah nengeri mantu ejensi nya dulu, laban beratika KEMAS baruh pegai perintah besai, nadai chukup bajet deka ngemanah tauka ngaga tabika baruh pegai KEMAS.
“Pekara tu enda ulih di anti bajet sida iya, laban tabika tauka tadika baruh KEMAS, enda tau enda digaga baru tauka dikemanahka agi, laban sekeda tabika/ tadika sigi udah lama, sekeda nya, digaga ( kelia) ba bukit ( bisi penanggul pengelikun), numpang ba rumah JKKKK, ngena ruai rumah panjai tauka nyuwa rumah orang,” ku Fatimah.
Iya madah munyi nya ba aum media, pengu- dah ngetuaika aum enggau KEMAS Sarawak bekait enggau pekara tu di opis menteri nya di Bangunan Baitulmakmur ditu, kemari.
Iya nandu baru madahka ‘ modus operandi’ ke sebaka, baka ke dikena ulih perintah nengeri tu ngaga sekula lama, tauka udah jai di menua tu diganti enggau sekula baru tauka digaga manah baru, deka dikena ulih KEMAS, Sarawak.
“Reti nya, perintah nengeri mansutka wang turu dulu, kena ngaga Tabika baru, udah nya ila, nagih ungkup ke udah dikena nya ari Perintah Besai. Tu sadang ke deka dibantai sereta dipejuraika ba aum kabinet bulan Disember tu ila,” ku iya.
Reggat keterubah ku iya, bisi 11 buah tabika ke deka digaga baru tauka digaga manah, ke nyadi lis pemerat ari sukut, tabika nya udah lama tauka udah jai, bisi penanggul tanah, tabika nya numpang rumah JKKK, tauka orang bu- kai, numpang Balai Raya, ruai rumah panjai, tauka nyuwa.
“Baka tabika ke numpang rumah orang, ni naka pengelama ulih numpang rumah orang? Tauka, nyuwa, tauka tabika nya enda likun alai anak mit belajar ( laban bisi tabika ke digaga ba bukit) tauka tabika nya sementara digaga ba tanah orang.
“Ba sentang tabika ke digaga ba tanah orang bukai, KEMAS deka ngemutarka pekara nya.
“Nya alai, aku mega meri terima kasih ngagai Kaban Kunsil Nengeri ( ADUN) ba sitak sida ke bisi udah mantu nengah MRP tauka RTP meri wang turu ngagai tabika KEMAS ngelama tu, ngambika sida iya ulih ngemanahka agi tabika sida iya,” ku iya.
Sama bisi ngulu aum media nya kemari, Sekretari Mendam KKKWKPK Dr. Saadiah Saad enggau Pemangku Direktor KEMAS Dayang Monalizawati Abang Ismail.