Raban komponen BN dilalau nyukung Salang ngetanka penuduk
JULAU: Bala raban komponen parti Barisan Nasional (BN) dipinta meri sukung ngagai Kaban Parlimen (MP) Julau Datuk Joseph Salang Gandum ngetanka penuduk parlimen nya maya Pengawa Bepilih Besai Ke-14 (PRU14) ti deka diatur sebarang maya berengkah ari diatu.
Kaban Kaunsil Besai Parti Progresif Demokratik (PDP) Alexander Asing Sadai madah, nama Salang udah ditukuka Presiden Parti Rayat Sarawak (PRS) Tan Sri Dr James Jemut Masing mengkang bediri ba penuduk enggi BN nya. “Aku ngarapka semua raban dalam BN lebih agi baka ari PDP bela ngundi Salang ba PRU14 tu ngambika iya ukai semina menang tang deka bulih majoriti undi ke besai agi,” pia ku iya madah maya ke datai enggau nyempulang Salang nemuai ngagai Rumah Kunsilor Genta Sabot di Nanga Bilat ditu, kemari.
Nambahka jaku iya, Alexander maya tu madahka PDP enggau PRS begempung penemu nyukung chalun parti diri bediri ba penuduk ti diungkup ngagai sida ngambi pulaika pemanah enggau penguntung ngagai BN.
“Pia mega baka rayat di menua pesisir, anang ati dua nandu sukung kita ngagai BN laban kitai ngira asil ari undi kita deka ngerandang jalai ke manah agi ngangkatka pengidup ngelawa tikas ti likun.
“Kitai mengkang randaka saup perintah ngagaka kitai pemansang baikka pemansang infrastruktur, penatai pemisi tauka pelajar anak kitai,” ku iya ti mega Sekretari Politik Ngagai Kepala Menteri.
Salang ba jaku iya maya tu madahka iya endang baka ngelama tu enda kala bechiping ngagai rayat baikka ngundi iya tauka enda.
“Aku udah betaun- taun nyadi pengari rayat di menua pesisir lalu semampai deka ngabas sereta betemu enggau rayat ba Parlimen Julau taja bisi sekeda enggai nyukung aku.
“Tang serak tu aku andal amat sida ke nengah jalai siti datai pulai bela begulai enggau BN udah tu,” pia ku iya madah.
Iya mega enda nyalam ke diri enda ringat ngagai sida ke gawa perintah ti enda nyukung BN baikka di Julau tauka di Pakan taja pan bisi sekeda penyukung BN ngansak iya ngambika ‘ngukum’ sida nya.
“Nyema sida enggai meda aku tauka BN lalu majakka diri nyakal kelimpah melitik runding rayat bukai ngambika bela enggai meda aku, ba aku, nya bepanggai ba sida empu, sida ti enggai ngasaika pengelantang pengidup sereta semampai pedis ati.
“Pekara baka tu tau dilengka laban semua pengari BN ke udah dipilih ngembuan tuju tauka juluk ati ti sebaka iya nya deka gawaka rayat lalu ransing deka nyaup ngemansangka pengidup rayat,” ku iya madah.