Penyalah nyual, gian dadah patut ditagang kenyau ari diatu: Talip
BINTULU: Pengawa nagang penyalah gian dadah ba tikas ti tumu iya nya ba nembiak rebak baru patut chakah agi dipejalai laban sida tu ti deka nyadi raban pemesai megai menua jemah ila.
Menteri ba Opis Kepala Menteri (Integriti enggau Ombudsman) Datuk Talip Zulpilip madah, sentang pekara tu piak penerit adat dipinta bekerejasama enggau pangan diri dikena ngemunaska pengawa nyual sereta nginsap dadah nyengkaum kes jenayah ke bukai seraya nyeliahka sida ngaul diri ba pengawa makai suap.
“Bacha pansik ba kes gian dadah dalam komuniti kitai diatu majak nyadi nyentukka udah meri empas negatif ngagai menua kitai.
“Raban nembiak rebak baru ti nyadi iya nya sida ke suah agi ngaga penyalah tu ke lalu nyadi penusah dalam komuniti kitai,” ku iya nyemetak.
Iya madah munyi nya lebuh ti bejaku ba pengerami nutup ‘Seminar Pendaya Upayaan Komuniti’ ti udah bejuraika pekara ‘Memperkasa Pendekatan Menangani Isu Dadah’ ke udah diatur Majlis Tindakan Membanteras Dadah Bagi Menua Bintulu ba Auditorium Gerempung Pemansang Bagi Menua Bintulu (BDA), Wisma Bintulu kemari.
Aum tu udah digulu urung 200 iku pesereta ti mega staf perintah, peribit, periman enggau ketuai komuniti.
Sama bisi datai iya nya Sapit Residen Bagi Menua Bitulu Hamdiah Bakir, Pemesai Pelilij Bintulu Mataip Sayu enggau Sapit Direktor Ejensi Anti Dadah Menua (AADK) Kartina Ujin.
“Raban nembiak patut kering enggau bepengerai laban sida tu ti nyadi penampung rebak baru ke deka meri sukung ngagai pemansang komuniti di menua tu,” ku iya.
Iya ke mega Kaban Kunsil Nengeri (ADUN) Jepak madah, enda mudah ngemunaska penyalah tu dalam komuniti kitai tang raban penerit adat, komuniti enggau Gerempung Ukai Dikuasa Perintah (NGO) patut begulai paling enda pan dikena ngurangka penyampau kes ti udah nyadi.
Iya mega udah meri tanya sekalika menua tu udah mujur dalam pengawa ngurangka penyalah gian dadah, laban bepelasarka bacha pansik kes ke dirikod majak nambah.
Beserimbai enggau nya, Talip madah, raban penerit adat patut ngambi inisiatif ti patut bekaul enggau ripot ke udah digaga rayat sentang penyalah ke udah digaga ba kandang menua sida kelebih agi ti bekaul enggau dadah.
Ba kenang ke bukai, Kartina mega bisi madah raban penerit adat enggau ejensi ke bekaul bisi ngaga sekeda pengawa dikena nentuka kes salah guna dadah tu nurun nengah bemacham program enggau aktiviti ba selampur menua.
“Pemesai ba renggat keterubah udah disedia ngambika ulih mantu perintah nengeri nyukung AADK ba program ke udah digaga.
“Taja pan bacha pansik kes salah guna dadah enggau penyampau sida ti gian dadah di Sarawak agi ba tikas ke likun, tang patut diperati nengeri tu mungkur kandang menua ke besai,” ku iya.
Iya ngelalau semua piak bekerejasama enggau naka ulih dikena ngemunaska penyalah gian dadah sereta jenayah ke bukai.