NREB deka ngetanka nama manah nyeliah ari pengawa makai suap
MIRI: Opis Pengeraja Asal enggau Rampa Menua ( NREB) patut ngetanka nama manah sida ari pengawa makai suap tauka salah guna kuasa lebuh bejalaika pengawa.
Menteri Muda Perambu Nengeri, Pengatur Tanah enggau Rampa Menua Datu Len Talib Salleh madah, NREB udah nyapai tikas ti pemadu manah sentang ‘Tahap Penarafan Pengurusan Kewangan 2016’.
“Penyulut tu mega udah ngayanka NREB mujur nentuka nadai pengawa makai suap tauka salah guna kuasa sentang pengawa ngatus pekara wang dalam NREB,” ku iya ba Pengerami Ngintu Hari Integriti enggau Inovasyen 2017 NREB ditu kemari.
Len Talib madah NREB mega udah nyain Sempekat Integriti Korporat (CIP) taun nyin kemari lalu 9 ari 10 inisiatif integriti nya udah mujur dipejalai sereta diayanka ngagai Komiti Nagang Pengawa Makai Suap Malaysia (SPRM).
“Aku ngarapka semua 10 inisiatif tu ulih dipejalai NREB sereta mayuh agi aktiviti ke bekaul enggau inisiatif CIP mega ulih dipejalai,” ku iya.
Len Talib madahka nengah bacha pansik SPRM ari Januari nyentukka Ogos taun tu, bisi 318 kes ti ngaul staf perintah ari bemacham pangkat udah dirikod.
“Staf perintah patut gawa enggau lurus nitihka kuasa enggau tanggungpengawa, komited, nadai penanggul ruang bilik, akauntabiliti sereta ulih nitihka atur enggau undang-undang,” ku iya.
Ba kenang ti sama, servis ke disediaka ungkup pemegai puku ti bekaul enggau NREB ulih dikemanah.
Tu nyengkaum ngena sis- tem chara ‘on-line’kelimpah ari ngena pom ke dikena ngaga peminta sebedau tu.
NREB mega udah bulih setipikit baru bekaul sistem kualiti MS ISO 9001:2015 ungkup proses ‘The Management of Environmental Impact Assesment’ (EIA) maya bulan March 2017.
“Sistem kualiti tu iya nya ke baru dikena nganti setipikit lama MS ISO 9001:2008, lalu pemujur tu udah mandangka NREB endang komited sentang pengawa nyaga kualiti servis,” ku iya.
Ba pengerami ti sama, Len Talib mega udah nyuaka setipikit ngagai penerima ‘Anugerah Perkhidmatan Cemerlang’ )APC) ngagai 15 iku staf NREB.
Sama bisi datai iya nya Controller Kualiti Rampa Menua NREB Peter Sawal, Residen Miri Sherrina Hussaini sereta temuai dipebasa ke bukai.