Pemeranak puku ari menua China di S’wak majak nambah

KUCHING: Pemeranak puku ari menua China di Sarawak majak nambah, ku Sapit Kepala Menteri Datuk Amar Awang Tengah Ali Hassan.

Pemadu baru ku iya, sebuah kompeni ari China udah beranakka puku USD$3 bilion di Samalaju.

“Kompeni nya deka numbuhka gudang ke bekaul enggau pengawa ngeluar besi lalu penyampau ke diperanak di nengeri tu chukup besai.

“Projek nya udah dipungkal ke alai sempekat pan udah disain lalu dikemata Menteri Besai di Beijing bedau lama tu tadi,’ku iya.

Awang Tengah mansutka jaku nya ngagai pengarang berita pengudah ngemata pengawa nyain Memorandum Kerejasama ( MoC) entara Pos Malaysia enggau Fujian Pacifik Network Co. Ltd.(FPNT) di sebuah hotel ditu, kemari.

Iya ke mega Menteri Pemansang Industri enggau Dagang Sarawak nambah, menua China udah nyadi kaling dagang Sarawak ke pemadu besai.

Tajapia ku iya, pemanah kaul dagang enggau China nya enda melakangka kaling dagang bukai baka ke ari menua Jepun enggau Korea.

“Pekara tu ukai mai reti kitai enda beratka kaul dagang enggau menua bukai baka ke Jepun enggau Korea.

‘Tang menua China ngembuan chara dagang ke agresif, sida ngembuan inisiatif ke besai,’ku iya nandu.

Awang Tengah nambah mayuh kompeni tauka ejensi ari kededua menua ngembuan kaul dagang ke manah.

Pekara nya ku iya mulaika pemaik ngagai Sarawak kelebih agi ba sentang e-dagang lalu logistik seiti pekara ti dikemerat.

Bela datai Menteri Muda Pekara Dagang,Pemansang SME enggau E- Dagang Datuk Mohd Naroden Majais, Menteri Muda Jalai Tebing Tasik Datuk Julaihi Narawi enggau Ketuai Sekretari Pelilih Fujian Lian Jianyong.