Pekit badminton Mangkuk Presiden SDNU platform ngiga pemain bansa Dayak ke landik

KUCHING: Pemain badminton ari serata nengeri udah ngerichahka gelanggang Sentosa Sports Centre di Jalai Stakan, Kota Sentosa dalam pekit badminton Mangkuk Presiden SDNU 2017.

Pekit tu berengkah diatur kemari lalu tembu sehari tu (23 September) enggau pengawa nyuaka perais ti deka diatur di The Rooftop Hotel Penview Hotel berengkah ari pukul 7 lemai tu lagi.

Tu taun ketujuh Gerempung Bansa Dayak Sarawak (SDNU) ngatur pekit nya kenyau ari iya keterubah diatur dalam taun 2011.

Temuai dipebasa Kaban Kunsil Nengeri ( ADUN) Tamin Christopher Gira Sambang, ti udah bejadika pekit kemari madah pekit tu deka nyediaka pelasar ngiga pemain ke landik ari raban nembiak bansa Dayak.

“Nengah pekit bansa tu, kitai arap ulih ngiga bakat baru ari komuniti Dayak ngarika nengeri tu ba sebarang main badminton renggat menua tauka antarabansa dudi hari,” ku iya.

Christopher ke mega Tukang Pekara Wang Besai SDNU berasai lantang meda SDNU ulih ngatur pekit badminton ninting taun nyadi sebagi ari aktiviti SDNU.

SDNU tu sebengkah gerempung pemadu tuai ditumbuh di menua tu kenyau ari jeman sebedau Malaysia ditumbuh lalu diatu bisi 36 pampang di serata nengeri enggau lebih 17,000 iku kaban rejista, ku iya.

Gerempung tu ditumbuh dikena ngempung pupu bansa Dayak di nengeri tu, enggau nyaga hak enggau peminta sida.

Iya udah nya ngemendarka RNM20,000 ngagai komiti pengatur dikena ngatur pekit dalam taun baru.

Berebak enggau nya, Chairman Pengatur Dato Paduka Anthony Nait Mani ke mega bisi bejaku madahka pekit tu deka mantu ngempuruka bansa Dayak ari semua serak pengidup ukai semina bepekit tang mega nyediaka palan ungkup sida ngaul sereta begulai bebaik.

Ku iya, taja tu pekit badminton tetutup Dayak, sida mega bisi nerima pesereta ari bansa bukai, peluang besai dikena negutka tanggam kaul pupu bansa.

“Kelimpah ari mai penyerakup antara mayuh komuniti Dayak di nengeri tu, kitai mega ngarap ulih ngiga bala nembiak ti landik bemain,” ku iya nambah.

Bisi 20 iti tim nyereta pekit ti nyengkaum main ‘singles’ enggau ‘doubles’.

SDNU diarika Raban Nembiak SDNU, SDNU Samarahan A, SDNU Samarahan B, SDNU Pampang Kuching, SDNU Simanggang 1 enggau SDNU Simanggang 2.

Tim ke bukai iya nya ‘ Persatuan Badminton Dayak Sarawak’ (Pebadas), ‘Pasukan Sejalai’, ‘Pasukan SIBAU’, ‘Pasukan Seraban’, ‘My BC Sibu’, ‘Madu Boyz A’, ‘Madu Boyz B’, ‘Pasukan Rhino’, ‘Lang Beuh A’, ‘Lang Beuh B’ enggau ‘Pasukan SRSBC’.

Sekeda bala temuai dipebasa ke bisi datai iya nya Mandal Presiden I SDNU Dr Gluma Saban enggau Mandal Presiden III Churchill Edward.

KE PENGINGAT: Christopher (sebelas kiba) begambar begulai enggau kaban komiti pengatur lebuh ti datai ba Sentosa Sports Centre.

KELAI NYERETA PEKIT: Christopher (dua kiba) nyuaka tepa ngagai kaban nembiak SDNU, Agnes Adin. Bela dikemata Anthony (kiba) enggau Churchill (tiga kiba).