Kes nembiak baruh umur ti betubuh bisi di nengeri tu ngirauka ati

MIRI: Kes nembiak pemadu biak ti betubuh bisi ke udah diripot ba Klinik Pengerai Tudan taun tu iya nya beumur 14 taun.

Menteri Muda Dagang Temuai, Seni enggau Main Asal Datuk Lee Kim Shin madah, 60 peratus kes ke diripot kenyau ari Januari nyentuk September iya nya ngaul nembiak ti beumur 16 taun ke baruh.

“Ungkup kes taun nyin kemari, umur paling biak iya nya 13 taun,” ku Lee ke mega Chairman Komiti Panel Penyanding Penemu sepengudah tembu aum di klinik nya bedau lama.

Iya ke mega Kaban Kunsil Nengeri (ADUN) Senadin madahka taja pan penyampau kes nya nurun, tang kes tu tetap dikemerat.

Nitihka bacha pansik, bisi 200 kes nembiak baruh umur ditemu betubuh bisi ke diterima ba taun 2015, lalu kes tu nurun ngagai 127 kes ba taun 2016. Ari Januari nyentuk September 2017 kes ke diterima iya nya 60 kes.

“Penanggul tu iya nya entara isu ke patut dikemerat. Kes betubuh bisi ba sida nembiak baruh umur ulih dikategorika kes pasung lalu isu ngirauka,” ku Lee nyemetak.

Berindik ari nya, komiti panel enggau klinik ngatur program outreach ngagai peranak di kandang menua ari baruh pegai klinik nya baka Pujut Tujuh, Permyjaya nyentukka Kuala Baram. Nengah program tu, komuniti di kandang menua besemak ulih beperesa pengerai baka meda tikas peninggi darah, penyampau gula, licha pengerai enggau chara ti engkeman ngintu nembiak mit. Lee madah, komiti panel ke ditumbuh kenyau ari taun 2014 nya ungkup meratika penanggul sereta timbal ari peranak enggau staf bekaul servis ke digaga klinik.

Sama bisi datai iya nya Pakar Perubat Ruang Bilik ke mega Sapit Chairman Panel Dr Maurice Steve Utappic.