Awang Tengah nerima penemuai basa pemesai ari Fujian

KUCHING: Sapit Kepala Menteri Datuk Amar Awang Tengah Ali Hassan kemari nerima penemuai basa seraban pemesai ari Pelilih Fujian, China ti diuluka Ketuai Sekretari Pelilih Fujian Liang Jianyong.

RabannyanemuaikeSarawak enggau tuju ngenegapka kaul entara kededua perintah, kaul dagang sereta kaul peranak Sarawak enggau Fujian.

Awang Tengah ba randau nya madah pekara dagang enggau pengawa beranakka puku entara Sarawak enggau Fujian bela bisi dipejurai.

“Kelimpah ari nya, perambu nyendia penerbai bilun entara Sarawak enggau Fujian bela dikerandau.

“Kitai mega bejuraika sentang awak dagang ke ulih ditumbuh Fujian di Sarawak baka ke industri elektronik teknologi tinggi, industri betanam betupi, industri nyendia pemakai enggau halal,’ku Awang Tengah ba sebengkah hotel ditu, kemari.

Awang Tengah ke mega Menteri Pemansang Industri enggau Dagang nambah industri kapal sereta biomass bela dikerandau enggau berat.

Ba pengawa kemari, Awang Tengah bisi ngemata pengawa nyain Sempekat Kerejasama (MoC) entara Pos Malaysia enggau Fujian Pacifik Network Co. Ltd. (FPNT).

Sempekat nya ngelaika Pos Logistik Berhad (PLB) dichiri nyadi ejensi ke nyendia servis esklusif pesan-nganjung eDagang FPNT di kandang menua Asia Tenggara.

MoC disain Ketuai Pemesai Eksekutif (CEO) Pos Malaysia Dato Mohd Shukrie Mohd Salleh lalu FPNT diarika CEO Wang Chengqing.

Kerejasama Pos Logistik enggau FPNT nya nyadi inisiatif ngerembaika pekara e-Dagang.

Pos Logistik deka nyadi palan antarabansa ti nyendia servis mai, nganjung sereta kargo.

Bela datai Ketuai Sekretari Pelilih Fujian Liang Jianyong.