Penanggul suntuk palan paking entukar di Simunjan deka teputar
SIMUNJAN: Penanggul suntuk palan paking entukar di Simunjan kelebih agi ba maya bisi pengerami deka diputar enda lama agi.
Pekara tu dipansutka Menteri ba Opis Menteri Besai, Datuk Seri Nancy Shukri rambau nemuai ngabas projek Dataran Kejat enggau Taman Botani ba Padang Main Bol, Jalai Sabun, Simunjan bedau lama tu tadi.
Iya ke mega MP Batang Sadong madah tembu projek ila, penusah ke suah ditapi mensia mayuh di Simunjan nya deka diputar.
“Tu mih penusah ke suah ditapi ditu kelebih agi maya bisi pengerami besai.
“Projek digaga nengah kerejasama Kaunsil Pelilih, Opis Kaunsil enggau ADUN Simunjan Awla Dris,” ku iya madah ngagai pemberita.
Kelimpah ari nya, projek ke nerima agih belanja ari Projek Mesra Rakyat (PMR) bela nyendia Taman Botani ti meri awak ngagai mensia mayuh nanam rempah.
“Aku kala mai ijinsi FRIM bejalaika pansik sentang utai tumbuh rempah di Gunung Ngeli ke alai dalam timpuh dua jam aja, sida(FRIM) bisi tetemuka 70 bengkah rempah di bukit nya.
“Tu seiti pekara ke unik lalu tau matak raban pemansik datai,” ku Nancy.
Nancy madah projek ke digaga chara berenggat nya mungkur tanah pemesai 2000 meter persegi.
Iya ngarap Dataran Kejat ulih tembu digaga sebedau Pesta Simunjan ti deka diatur kena 29 September nyentuk ngagai 1 Oktober 2017.
Pesta nya ila nyendia pekit lumba pump ski enggau ‘Simunjan kitchen’ ti dipasuk 30 bansal bejual pamakai asal.