Peranak Uma Balui Liko minta adat pemali ari perintah, mindah pendam
BINTULU: Peranak Uma Balui Liko, Sungai Asap di Belaga ngansak perintah nengeri berunding nitihka pematut ba peminta bayar pampas ngaul pengawa mindahka 48 buah pendam peturun sida.
Pengari sida, Ngian Diman madahka dua surat udah dianjung ngagai piak bekuasa bekaul pasal isu iya.
“Surat keterubah, hari bulan 6 March 2012 lalu surat kedua 28 Febuari 2014 udah dianjung tang dataika sehari tu, kami apin nerima sebarang timbal pasal status pinta bayar pampas,” ku iya madah ngagai The Borneo Post kemari.
Ku iya, bayar pampas nya dipinta pengudah peranak dia mindahka pendam lama kediri empu pengudah taba baru mindah ke dulu ampuh, endur mindah keterubah ditetapka piak bekuasa bekaul dalam taun 2012.
Ku Ngian, bisi 15 buah rumah panjai bekunsi tanah pendam ti dipindah lalu udah diberi bayar pampas ari perintah nengeri.
“Pengawa mindahka pendam ngagai menua ti dipechaya sida enda deka ampuh, tang taba nya mega kena ampuh.
“Peranak menua nya jampat bejalaika inisiatif lalu mindahka pendam nya kediri empu ngagai taba ke bukai ti nitihka adat kami empu,” ku iya nambah.
“Pengari rayat kami udah dipadah pasal pekara tu, nyangka sida mega agi nganti pemutus ari perintah nengeri.
“Kami semina deka nemu nama asil enggau status peminta ngulihka bayar pampas,” ku Ngian.
Nitih ku iya, peranak dia enggaika isu nya dikemain tauka dipolitik dudi hari, nya alai, sida ngarapka perintah ulih berundingka peminta sida nitihka pematut.
Ku iya, pinta bayar pampas patut dibayar nitihka pematut enggau ‘adat pemali udangundang kort ketuai raban bansa’ sida.