Bantaika pengamat Dayak mayuh nyereta PBDS
Enti nadai disempulang enggau statistik ,berita nya tau dikumbai berita selebubu aja, ku Dr Stephen Rundi
KUCHING: Parti Bansa Dayak Sarawak Baru (PBDBS) patut ngayanka pengamat sida ti madahka agi mayuh Dayak deka masuk parti nya sereta patut disempulang enggau statistik.
Sekretari Besai Parti Pesaka Bumiputera Bersatu (PBB) Dato Sri Dr Stephen Rundi Utom madahka dawa PBDSB nya ulih dipadahka semina berita selebubu enti enda disempulangka enggau statistik.
Ku iya, majoriti Dayak iya nya kaban enggau penyukung Barisan Nasional (BN).
“Nya penemu iya empu (Presiden PBDSB Cobbold John) enti nadai statistik dikena nyukung nya semina berita selebubu,” ku iya lebuh dipinta meri penerang bekaul enggau dawa nya, kemari.
Ngenang pekara ti sama,Sekretari Besai PBB Leonard Jambu madahka perintah nengeri enda ngira penatai bansa dalam semua pekara, lalu enda ninggal tauka nyeliahka Dayak.
Seraya madahka nadai batang penerang ke tegap dikena nyukung dawa Cobbold, iya madahka penyarut entara Menteri Besai Datuk Seri Najib Tun Razak enggau Chairman Pakatan Harapan Tun Dr Mahathir Mohammad ukai nyadika tegal kaban dalam BN bepindah parti ba penyampau ti mayuh.
“Isu ke dibantaika PBDS baka isu tanah pan udah dialuska lalu chara mutarka nya deka dikenataika Sapit Kepala Menteri Datuk Amar Douglas Uggah Embas ngagai Kepala Menteri Datuk Patinggi Abang Johari Tun Openg,” ku iya.
Kemari, Cobbold nengah penerang media madahka agi mayuh Dayak deka masuk parti nya nyengkaum sida ti kala nyadi kaban Parti Bansa Dayak Sarawak (PBDS) ke udah dikinsil pengerejista sida iya suba.
Iya madahka penyarut entara Najib enggau Tun Mahathir deka ngubah landskap politik Dayak.
Ku iya, kaban Parti Tenaga Rakyat Sarawak ( Teras) mega dipelabaka deka masuk PBDSB.
“Kami nerima (penyereta ) enggau jari ti tebuka. Pintu seruran ditukang ngagai semua sereta manah agi bala ex- kaban Teras nyereta kami laban tebal agi entara sida nya mega kala nyadi kaban PBDS enggau Parti Kebangsaan Sarawak (SNAP). Kami ngelaluka sida,” ku iya.
Nya penemu iya empu (Presiden PBDSB Cobbold John) enti nadai statistik dikena nyukung nya semina berita selebubu. Dato Sri Dr Stephen Rundi Utom Sekretari Besai Parti Pesaka Bumiputera Bersatu (PBB)