Penanggul ai di Balai Ringin deka diputar lengkas
BALAI RINGIN: Opis Bekal Ai Menua Pesisir (BLAB) Serian gawa ngerumban jam dikena mutarka penanggul ti ngasuh kesuh ai baruh di Balai Ringin.
Penanggul suntuk ai ti nyadi berengkah ari pun bulan Ogos taun tu tadi, nitih ku padah penulung injinir ari BLAB ti dipelaba ketegal sambung batang paip besai bisi pechah tauka merekah.
“Kami naka ulih gawa nitihka kapasiti diri dikena ngelala batang paip ti bepenanggul sereta mutarka penanggul nya enggau naka penyampat,” ku sapit injinir madah ngagai the Borneo Post lebuhka dirandau ba Palan Meresi Ai Balai Ringin, kemari.
Ku iya nambah Palan Meresi Ai Balai Ringin, ke bendar gawa baka jam gawa enggau nambahka tangki ai graviti ngambika ulih ngelepaska ai semua manggai 1.2 MLD ( juta liter sehari) ungkup bala penguna ba kandang menua nya.
Dikena nguji teori sida di semanjai sambung batang paip besai ti pesuk, raban nya ngisi penuh tangki ai lalu beratika iya dalam tengah bulan Ogos.
“Ari gaya ti diperatika kami semina empat ngagai lima jam aja iya (tangki ai) langkang. Tu nyangka deka ningkah teori kami bisi pantis ba diedini,” ku iya madah.
Pesuk nya ku iya, deka nyadi pun penanggul besai ba pengurang kesuh ai ngujungka tangki rangkai ditapi peranak di 12 bengkah genturung pendiau di Balai Ringin.
Iya mega ngakun, BLAB napi pemar ngelaika bagi endur ti pesuk laban endur batang paip besai enggau alur paip digaga dalam taun 1998, nadai sistem kar ti meruan.
Nya kebuah personnel BLAB ku iya meseti meresa nengah pengawa matau atas tanah berengkah ari pemansut ai di tetiap genturung pendiau.
“Naka ke diatu, kami nadai tetemuka sebarang batang paip ai ti pesuk ba mua jalai ti mai reti penanggul nya dalam tanah,” ku iya nambah.
Sama bisi datai Menteri Muda Nembiak enggau Lumba Datuk Snowdan Lawan ti merambu ngagai BLAB ngambika ngaga kar sistem paip ke bisi dalam kandang menua nya laban sida bejalai ngiga endur ti pesuk diatu.
Tu ku iya deka mutarka sebarang penanggul ke sama ngagai peranak di Balai Ringin kelebih agi ti mangka bala nembiak sekula di Sk Balai Ringin enggau SMK Balai Ringin.
“BLAB ari penusah nya udah mujur nyambung ai ari Kpg Sepan ngagai blok sekula enggau rumah endur bemalam iya,” ku iya nambah.
Iya mega madahka perambu patut dianjung ari BLAB ngagai Opis Menteri Perengka Guna Mensia Mayuh ngambi ngangkatka pemanah Palan Meresi Ai Balai Ringin.
Perambu belanja ti ditambah iya deka manggai urung RM500,00 dikena ngemanahka palan meresi ai 20 taun pengelama ngena pam ai ke baru sereta ngemanah penyikap perengka guna iya. SIBU: Dayak Think-Tank Group (DTTG) semampai chakah nyuaka bantu ngagai raban bansa Dayak ke bisi ditinggang penusah.
Empai lama tu tadi, gerempung nya ti diarika DTTG Miri datai ngabas penusah rabat niang Linang Muli ba Phase 6 Tudan, Miri.
Maya tu, gerempung nya diuluka Sapit Chairman DTTG Miri Phiilip Asry bisi nyuaka tulung ngagai kaban belayan niang.
Niang, 53, peranak asal ari Sri Aman udah lama ngentapka pendiau di Miri dipadahka midang sepengudah napi strok kenyau empat bulan ke udah kelimpah bisi penyakit bukai baka tibi enggau tinggi darah.
Niang bisi tiga iku anak tang dua iku anak indu iya udah beruang bilik kediri sereta enda diau enggau iya agi.
Anak lelaki iya lama udah nadai ditemu rita.
Ngelama tu, iya diau begulai enggau indai iya ke beumur 93 taun ti mega enda tentu bepengerai.
Sama bela datai ngulu pengawa rabat tu iya nya Kaban Parlimen Miri Dr Teo Yu Keng ti mega bisi nyuaka tulung maya nya.