Lis nama chalun PRS ke PRU14 udah dianjung ngagai Kepala Menteri
KUCHING: Lis chalun ke Pengawa Bepilih Besai ke-14 (PRU14) ari Parti Rakyat Sarawak (PRS) udah di anjung ngagai Kepala Menteri Datuk Patinggi Abang Johari Tun Openg, lalu ari enam iti lis chalun nya, semina empat aja ke udah ditetapka, dua lalu bedau ditetapka, iya nya ke sitak Lubok Antu enggau Selangau.
Sapit Kepala Menteri Tan Sri Datuk Amar Dr. James Jemut Masing madahka semua enam lis chalun PRU14 tu ila udah dianjung ngagai Kepala Menteri Datuk Patinggi Abang Johari Tun Openg, tang taja pia, naka kediatu semina empat iti lis nama aja ke dikira udah dikemendarka.
“Lis chalun ke Lubok Antu enggau Selangau bedau di tetapka, tang ke bukai udah (kala dirintaika sebedau tu). Kededua buah sitak nya, Lubok Antu enggau Selangau bedau ulih dipadah ngagai kita diatu, tang ila aku deka madah sapa chalun PRS di kededua sitak nya.
“Proses netapka chalun muntang aja, enti Kaban Kunsil Nengeri (ADUN) di sitak nya udah netapka chalun ke patut ungkup PRU14 di sitak nya, aku pan nadai pilih bukai tang netapka chalun ke dipilih ADUN nya, laban raban ADUN tu ke nerima sukung ari rayat di sitak nya.
“Datai ke seharitu, aku lalu bedau nerima surat netapka chalun PRU14 ari ADUN Lubok Antu enggau Selangau. Awakka dulu, udah tu ila baru mutarka pekara nya. Enda ulih aku kediri aja netapka chalun ba siti-siti sitak nya, enti nadai sukung ari ADUN di sitak nya,” ku iya.
Iya madah munyi nya lebuh dikerandau pengudah ngemunka atur pengawa ‘10th Sarawak Amateur Masters Open Golf championship 2017, YB Tan Sri Datuk Amar Dr.James Jemut Masing, Deputy Chief Minister of Sarawak challenge Trophy’ di Kelab Golf Sarawak ditu, kemari.
Masing ti mega nyadi Presiden PRS ditanya enti nyema iya (Masing) nadai nerima penetap ari dua iku ADUN ari Lubok Antu enggau Selangau pasal chalun PRU 14, Masing madah iya deka nanya ngagai ADUN nya empu, sapa ke engkeman tau nyadi chalun di sitak nya, bepelasarka sukung ari pun menua.
“Enggai nyadi enti kitai ngeletakka ‘chalun ulih menang’ (winnable) enti nadai penetap ari ADUN di sitak nya, laban sukung sida iya datai ari pun menua,” ku iya.
Masing ti mega mangku pengawa nyadi Menteri Pemansang Infrastruktur engggau Pengangkut nandu baru madahka, iya udah ngerintaika 4 ari 6 iti nama chalun, lalu udah nguanjung lis nama ngagai Kepala Menteri enggau Menteri Besai.
“Semua nama chalun nya begunaka pemendar ari Kepala Menteri enggau Menteri Besai, tang dua iti nama ke Lubok Antu enggau Selanggau lalu bedau ditetapka,” ku iya.
Taja pia, iya madah ba senentang tiap chalun ke deka diperesa ulih Opis Nagang Penyalah Makai Suap Malaysia (SPRM) sebedau sida iya minta pilih nyadi chalun, Masing madah, nya nadai penanggul ba iya.
“Nyangka pekara nya ukai pekara ke mesti tang nadai penyalah enti chalun PRS diperesa, awakka SPRM meresa laban sida iya nemu agi ni bagi chalun ke ulih bediri.
“Laban kami (PRS) pan enggai enti bisi penanggul nyadi ila, SPRM ngembuan penemu ke manah agi ari nya, laban pengawa SPRM lebuh sida iya meresai, semua utai pasal chalun nya deka diperesa,” ku iya.
Ba seiku orang, Desmond Sanjan ke udah ‘turun padang’ minta pilih, betemu enggau mensia mayuh, ke kenu ngarika PRS, ku Masing:
“Nyauka ninting maya pengawa bepilih besai menua, mayuh orang ke deka ngelobi diri empu nyadi chalun, tang tu pengawa ke baka selama (normal), taja pia, kitai anang ngemaruhka sida tu tauka enggai meransang sida iya, awakka sida iya bejalaika pengawa sida iya ngelobi deka nyadi chalun.
“Tang utai ke enda manah, berapa bulan sebedau pengawa bepilih, kitai beratika mayuh ‘chalun’ pansut, nya utai ke enda manah, enti nitih, sida tu patut dipeda mensia mayuh gawa belama.
“Baka empat taun ke udah (PRU), mayuh ‘chalun’ dipeda bejalaika pengawa sida iya betemu enggau mensia mayuh, mantu orang mayuh, lalu nanya ni gaya pengawa ke ulih digaga sida iya. Anang meh baka nya, berapa bulan sebedau pengawa bepilih, sida tu pansut, utai baka tu ke tusah,” ku Masing.
Iya nandu baru, madahka taja pia, pengawa ngayanka diri lalu ngelobi deka nyadi chalun, utai ke normal, lalu bepelasarka proses demokratik, maya bepilih mayuh orang ke deka minta pilih, nguji nasit, mandangka diri.
“Aku ngelala Desmond, tang enda aku nemu enti iya udah ‘turun padang’ betemu enggau mensia mayuh, tang aku ngelala iya,” ku iya.
Kediatu, Kaban Parlimen PRS, iya nya Datuk Masir Kujat (Sri Aman), Datuk William Nyalau Badak (Lubok Antu), Datuk Joseph Salang Gandum (Julau), Datuk Aaron Aro Dagang (Kanowit), Datuk Joseph EntuluBelaun(Selangau)enggau Datuk Wilson Ugak Kumbong (Hulu Rajang).
Sama bisi enggau ngulu atur pengawa nya kemari, Menteri Muda Nembiak, Lumba enggau Main ti mega nyadi Ketuai Pemuda PRS Datuk Snowdan Lawan, ADUN Tamin Christopher Gira Sambang, Salang, Masir, enggau chairman pengatur pekit golf, Datuk Seri Thomas Lau.