Pengajar meseti mantu Rozila Zainol bulih perais RM1 juta ba ‘Cabutan Istimewa’ rambau pengerami ‘Cabutan BSN SSP’ nembiak nemu bidang pelajar ti bisi makit kereja
Ngambika nembiak ba pelasar ti betul lalu ulih nyeliahka penanggul sida ti tusah ngiga pengawa
SIBU: Rozila Zainol ari Kedah udah dipadu ngempu perais RM1 juta ba ‘Cabutan Istimewa’ Bank Simpanan Nasional (BSN) nengah BSN Sijil Simpanan Premium ( BSN SSP) ungkup bulan September 2017.
Pemutus tu dibantai maya pengerami ‘ Cabutan BSN SSP’ ba Delta Mall ditu, kilah ensana.
Kelimpah ari iya, perais kerita BMW 330e serak tu diempu Tan Fong Pic ari Kuala Lumpur nengah kategori Cabutan Bulanan lalu Muhammad Farhan Tajudin ari Perak ngempu perais BSN SSP RM10,000 nengah Cabu- tan Remaja-Kategori Khas.
Berebak enggau pengerami nya kemari, bela dirami maya tu iya nya sida ke menang ungkup bulan Ogos tu tadi.
Ungkup bulan Ogos, perais RM1 juta diempu Nor Hayani Abu ari Selangor lalu perais kerita Mercedes Benz C200 diempu Atan Abdul Wahab ari Johor.
Ba kategori Cabutan Remaja-Kategori Khas, perais BSN SSP RM10,000 diempu Audrey Celestine Wijaya ari Melaka.
Taja pan baka nya semina Atan Abdul Wahab aja bisi datai maya tu.
Perais iya maya tu disuaka Menteri Dagang Antarabansa enggau E- Dagang ti mega Menteri Wang II Sarawak Dato Sri Wong Soon Koh.
Ba pekara bekaul, ari semua penyampau perais iya nya RM17.7 juta, sepenyampau 13,536 perais deka diungkupka ngagai sida ke nyimpan BSN SSP sepemanjai taun 2017 lalu 1,128 deka diberi ninting bulan.
Sama bela datai maya tu iya nya Direkter Dagang Nengeri BSN Sarawak Sharulnahar Jaafar enggau Sapit Ketuai Eksekutif Perbankan Runcit BSN Frederick Siew Kin Meng. MIRI: Bala pengajar di nengeri tu patut mantu sereta ngiring bala nembiak sida ngelala ni bagi bidang ti bisi makit kereja tinggi tauka bisi mayuh pengawa puang, nentuka sida ba pelasar ti betul.
Pengawa tu patut dikereja dikena nentuka nembiak napi penanggul nadai kereja pengudah tembu belajar sereta teulihka kereja kelebih agi dalam bidang teknikal enggau pengelandik ti bisi makit kereja ti mayuh kemaya hari tu.
Kaban Kunsil Nengeri (ADUN) Samalaju, Majang Renggie madah tu belalauka peneleba diasaika iya empu ti nerima mayuh sebana enggau penatai raban graduet ti ngiga kereja di kandang menua bungkur Koridor Kuasa Ulih Dikena Baru Sarawak ( SCORE), tang pelajar ti dikembuan sida enda tetipakka peminta kereja ti dibuka.
“Tang sida ti bisi pelajar dalam bidang pengelandik enggau teknikal nadai kala datai ngagai aku, laban sida nadai napi penanggul ngulihka kereja dibanding nembiak ti ngambi bidang kaunseling tauka sains kognitif, ti mar ngulihka kereja,” ku iya.
Nya alai ku iya, gerempung baka Serakup Bala Pengajar Dayak Sarawak ( SDEA) megai tanggungpengawa beguna endar, iya nya ngiring nembiak ngagai bidang ti nyamin kereja dudi hari bala graduet kelebih agi ari bansa Dayak.
Iya mansutka jaku nya rambau bejaku ba pengerami makai lemai enggau pengawa ngelancharka SDEA Zon Miri di sebuah restoran tebilang ditu, malam kemari.
“Pengawa tu patut digaga serakup baka SDEA, madah ngagai bala nembiak kitai kelebih agi sida ti deka napi peresa SPM enggau STPM, bekaul enggau bidang pelajar ti muntang ungkup sida buloih kereja sereta universiti perintah ti tau dipasuk, ngambika lebuh sida nembuka pelajar ila, ngiga kereja ukai pekara besai ti nanggul sida,” ku iya nambah.
Majang dalam jaku dipansutka iya mega muji pengawa bala pengajar Dayak di nengeri tu ba pengawa numbuhka pelasar ungkup sida begempung sereta gawa mantu ngangkatka pemanah tikas pelajar komuniti Dayak di nengeri tu.
“Aku pechaya tu ketegal sida rinduka tanggungpengawa rama ti deka ngaul diri sereta gawa volunteer mantu bala nembiak kitai, kelebih agi ari bansa Dayak.
“Perintah endang ngenang pemanah pengawa digaga SDEA, ke alai Sapit Kepala Menteri, Datuk Amar Douglas Uggah Embas empu ke nyadi penaung serakup tu,” ku iya.
“Tu ngayanka pengandal kita semua ba juluk enggau pengawa kita, taja kiruh enggau pengawa diri sereta ke bukai, tang kita terus meri penemu enggau buah runding ngemujurka pemansang pelajar bansa Dayak,” ku iya nampung silik agi.
Berebak enggau nya, ku Majang, perintah nengeri endang ngelaluka gempung korporat enggau sektor peribit ti deka mantu ngemansangka pelajar di nengeri tu kelebih agi sekula di kandang menua pesisir nengah tanggungpengawa rama korporat (CSR), ngambika sida ulih nyediaka penyikap perengka guna pelajar baka ngambu sekula sereta mantu nyediaka perengka rama ti menyana agi.
Dulu agi ari nya, Chairman SDEA Zon Miri, Dr Nelson Tandang madahka serakup nya ngelaluka raban pengajar Dayak di nengeri tu kelebih agi ba Zon Miri ke baru ditumbuh, nyadi kaban.
“Taja pia, kaban tu semina ungkup pengajar ari bansa Dayak aja ti gawa di baruh Opis Menteri Pelajar. Ngagai bala pengelicha tauka pengajar ari kolej komuniti, palan pelajar tinggi (IPT) enggau sida di baruh Opis Menteri Pelajar Tinggi (KPT) enda diterima nyadi kaban SDEA,” ku iya nampung baru.
Ngelansa pasal SDEA, ku Nelson dataika diatu, serakup nya bisi 715 iku kaban rejista di serata nengeri, seraya di Miri ti baru ditumbuh dalam bulan Ogos tu tadi lalu diatu benung chakah ngambi kaban baru ari Zon Utara nengeri tu.
“Berindik ari nya mega, kami SDEA Zon Miri begunaka sukung ari bala pengari rayat, bala tuai rumah panjai enggau gempung ukai dikuasa perintah (NGO) ari bansa Dayak, ba pengawa kami ti deka ngangkat sereta ngeninggika standard pelajar bansa Dayak di nengeri tu,” ku iya nyimpul.
Tang sida ti bisi pelajar dalam bidang pengelandik enggau teknikal nadai kala datai ngagai aku, laban sida nadai napi penanggul ngulihka kereja dibanding nembiak ti ngambi bidang kaunseling tauka sains kognitif, ti mar ngulihka kereja. Majang Renggie ADUN Samalaju