Badu bekelikuhka isu raban ketuai ti nepan bilun soldadu ngagai KL
KAPIT: Ketuai Komuniti Dayak Iban Bagi Menua Kapit, Temenggong Wilfred Billy Panyau nyemetak madah endang nadai salah terebai ngena bilun soldadu ari Sibu ngagai Kuala Lumpur (KL). Iya minta bala penyakal politik enggau penyukung sida badu agi ngemanjaika isu nya.
Billy nimbal berita ti bisi ayan ba The Borneo Post, kena Hari Dua, 3 Oktober 2017, lambar 8 – Baru ngerara Masing pasal kebuah nerebaika bala tuai rumah ngagai Putrajaya ngena bilun soldadu.
Aum pengarang berita udah diatur kemari di bilik konferen Komplek Nengeri Bletih ti bela digulu Temenggong Tan Kian Hoo, Pemanca Haji Wasli Nor, Pemanca Yong Thu Fook, Penghulu Haji Abang Hamzah Bolhassan, Penghulu Lawrence Bantak, Penghulu Pasang Tuba, Penghulu Wong Kie Ing, penghulu Sia Shui Poh, sereta bala bukai.
Billy, ex-soldadu (Soldadu British lalu pengudah Malaysia Merdeka, nyadi Pemesai Warrant 1 – 1960an – 1980an) nikalka kenang diri rambau gawa nyadi soldadu, mayuh operasyen – di Brunei rambau Brunei Rebellion, Ba Kalalan rambau Konfrontasyen Indonesia, Johor, Melaka enggau Perak, sereta ke bukai.
Ku iya, pengudah badu gawa nyadi soldadu, mayuh ari sida dipadu nyadi tuai rumah, penghulu, pemancha enggau iya empu nyadi temenggong.
“Kami dipadu laban perintah ngenang pemanah pen- gawa enggau jasa kami ngetanka hak menua, integriti enggau pengelikun.
“Diatu perintah udah ngintu pengelantang kami lalu kami endang patut dipebasa ketegal jasa enggau pengawa nyaga menua.
“Ba aku, nadai kebuah kami enda ulih mindah ngena bilun soldadu. Pengawa nerebaika kami ngena bilun soldadu ari Sibu ke Kuala Lumpur nya pengawa ti betul.
“Nama kebuah orang bukai (penyakal enggau penyukung sida) kiruh deka bemainka isu tu ba media rama enggau media chelak,” ku Billy.
Bisi 160 iku ketuai komuniti enggau pengari ari renggat pun menua ari tiga sitak Parlimen Kanowit, Kapit enggay Ulu Rajang terebai ngena bilun soldadu ari Sibu ke Kuala Lumpur ba pejalai nemuai meri basa ngagai Menteri Besai Najib di Putrajaya, kena 27 ngagai 29 September tu tadi.
Raban ti diuluka Sapit Kepala Menteri Tan Sri Datuk Amar Dr James Jemut Masing, Sapit Menteri Pemansang Menua Pesisir enggau Kandang Menua Datuk Alexander Nanta Linggi.
Kelimpah ari nemuai meri basa ngagai Najib, sida mega bisi dikangau nemuai ngagai Sapit Menteri Besai enggau Menteri Ngetanka Menua di Putrajaya.
“Nyadi ketuai komuniti, kami ngenang pemanah Najib ti ngagihka belanja dikena ngemansangka Bagi Menua Kapit. Kami meri terima kasih ngagai iya.
“Pia mega, kami bisi nyuaka keretas kereja ngagai Menteri Besai ba peminta ari renggat pun menua. Kami meri terima kasih ngagai Kepala Menteri Sarawak Abang Johari ti udah ngadaka Upper Rajang Development Authority (URDA).
“Nya alai, kami minta belanja ari Menteri Besai laban iya ke nyadi Menteri Wang. Kitai tau ngembuan mayuh penemu enggau perambu pemansang tang pekara ti beguna endar iya nya belanja dikena bejalaika projek nya.
“Diatu, mayuh projek besai benung dipejalai, ambika chunto, pengawa ngaga jalai, Bekal Kuasa Karan Menua Pesisir (RES), tang kami dekaka mayuh agi dikena nyapai baka ti udah bisi dikembuan di mengeri besai baka di Kuching tauka Miri,” ku Billy nerang.
Billy dulu agi ari nya madahka Masing udah nerang pematut sida ngena bilun soldadu.
“Taja pia, penyakal enggau bala penyukung sida bekelikuhka pekara nya lalu bemainka isu ti bekenaka nama kami (bala ketuai komuniti) nguji ngaga penyarut.
“Ulah ti beambi ulih ba ‘gelar’ orang bukai tu patut diketu,” ku iya nandu.
Iya nangkan sida ngambika anang ngena nama ketuai komuniti beambi ulih ba pejalai politik sida.
“Sida patut mantaika diri ulih gawa ba sitak dipegai.”