Pengelantang pengidup raban ex-soldadu semampai dikemerat
SIBU: Pengeransing perintah ti inklusif sereta holistik semampai ngemeratka pengelantang pengidup raban ex- soldadu taja sida udah badu gawa.
Kaban Kunsil Nengeri ( ADUN) Dudong Datuk Tiong Thai King madah, pekara tu nyemetak dipeda nengah Kimpin Turu Bujang Berani ke diatur ti nyadika chara dikena ngiga pemeri ari semua piak nambahka penyampau turu pengelantang pengidup raban nya.
“Asil ari turu ke digiga tu, kitai deka meri ex-soldadu ti randaka bantu baka sida ke timpang pendiau, balu tauka anak sida ti deka nampung pelajar,” pia ku iya madah maya bejadi Kimpin Wang Turu Bujang Berani Renggat Nengeri Sarawak 2017 ke diatur ba laman Makit Sentral Sibu ditu, kemari.
Sama bela datai maya tu iya nya Presiden Gerempung Veteran Soldadu Malaysia Nengeri Sarawak (PVTMS) Thomas Ling enggau chairman komiti pengatur kimpin Idres Adam sereta bala exsoldadu ke bukai.
Tiong madah, batang tuju kimpin nya diatur iya nya matak mensia mayuh ngambika bela ngenang sereta beterima kasih ngagai pemerani bala veteran soldadu Malaysia ti berambunka nyawa ngetanka pengelikun menua tu suba.
“Enti nadai ulah ke berani ari sida Bujang Berani, menua kitai endang enda ulih ngasaika pengelantang enggau pengelikun baka ke dipeda kitai sehari tu.
“Nya alai, mensia mayuh anang muai awak tu bela nyuaka pemeri ngagai kimpin ke diatur PVTMS tu dikena kitai mandangka diri berasai beterima kasih ngagai bala Bujang Berani,” ku iya madah baru.
Berebak enggau awak nya mega, Tiong andal veteran soldadu mengkang bediri begulai enggau perintah enda ngira senang tauka pedis semina ketegal ba tuju ke sebaka iya nya ketegal menua tu.