JPS Sarawak patut beratika penanggul tanah tusur
Bepelasarka pansik ba taun 2015 ngayanka 163 km ari 1,234 km jalai tebing pantai di nengeri tu balat tusur
KUCHING: Opis Parit enggau Entali Ai (JPS) Sarawak patut bebendar agi beratika penanggul tanah tusur di sepanjai tebing sungai enggau jalai tebing pantai ba nengeri tu.
Menteri Kaunsil Kandang Menua enggau Pengawa Berumah, Datuk Prof Dr Sim Kui Hian madahka Pansik Tanah Tusur Tebing Tasik Nasional 2015 ti dikeluarka JPS Malaysia ngayanka iya nya 163 kilometer (km) ari 1,234 km jalai tebing pantai di nengeri tu betapi enggau penanggul tanah tusur ke chukup balat.
Tanah tusur tebing sungai ku iya, ukai semina ngeruga peranak ke diau semak nya baka ba tebing sungai di Simunjan, Gedong, Lundu enggau Batu Kawa aja tang mega sistem parit enggau entali ai kitai.
“Isu tu mungkur mayuh faktor nyengkaum langgur enggau aktiviti pemansang mensia ba sitak penimbun ai enggau zon tebing tasik sereta begunaka kerejasama entara ejensi.
“Taja pia, JPS ulih nempa kerejasama enggau opis menteri aku nyimpulka polisi
Isu tu mungkur mayuh faktor nyengkaum langgur enggau aktiviti pemansang mensia ba sitak penimbun ai enggau zon tebing tasik sereta begunaka kerejasama entara ejensi. Datuk Prof Dr Sim Kui Hian Menteri Kaunsil Kandang Menua enggau Pengawa Berumah
dikena mantu betapi enggau sekeda isu tu sereta chara ti lebih holistik enggau inklusif,” ku iya.
Iya mansutka pekara nya lebuh bejaku ba Pengerami Makai Lemai Ulangtaun Ke- 50 JPS Sarawak ba sebengkah hotel ditu, ensanus.
Dulu ari nya Dr Sim madahka dalam timpuh 50 taun tu JPS udah bejalaika tanggung pengawa ti amat beguna ba pengawa ngemanahka kualiti pengidup di nengeri tu dalam mayuh bengkah sektor.
Dalam bidang betanam betupi ambika banding, infrastruktur parit enggau entali ai ti nyendiaka kandang ngelinggi ti kondusif ngagai pengawa betanam betupi ke dipejalaika ke lalu nagang penusah bah nyadi.
Tu ku iya, ulih ngemanahka asil ketau seraya nambahka penatai pemisi pekebun ngambika ulih ngasaika pengidup ke lebih menyana.
“Ba kandang mengeri, JPS bejalaika pengawa mutarka penanggul bah nengah program tekat bah enggau entali ai mengeri.
“Ambika chunto, Projek Fasa 1 enggau 2 Rancangan Tebatan Banjir (RTB) Sibu udah tembu ba taun 2015 enggau ungkus ngaga RM191 juta iya nya seiti ari projek besai ke dipejalaika JPS.
“Kenyau ari projek nya udah tembu dipejalaika, nya udah ngurangka penusah ampuh bah sereta enti skim nya udah tembu magang ila, mengeri Sibu deka nadai betapi enggau penusah ampuh bah ke nyadi ketegal ai ke lebih tauka besai ari Batang Rajang,” ku iya.
Dr Sim nyambut manah ungkup belanja besai ti diterima JPS Sarawak iya nya lebih RM800 juta ari perintah besai enggau nengeri dikena bejalaika mayuh bengkah projek pemansang dalam timpuh 2016 ngagai 2020.
Berindik ari nya iya ngarapka semua projek ti diperambi nya deka bejalai enggau lanchar sereta ulih ditembuak nitihka ungkus enggau timpuh ke udah ditetapka.
Sama bisi datai, Menteri Muda Kaunsil Kandang Menua, Datu Dr Penguang Manggil, Chairman Kaunsil Mengeri Padawan (MPP), Lo Khere Chiang, Direktor JPS Sarawak, Chok Moi Soon enggau ke bukai.