Urung 40 kerusi roda udah diberi Lee dikena mantu peranak Miri
MIRI: Siku orang tuai beumur 70an, Geya Ekom ti enda dapat bejalai enggau bediri ketegal ‘bungkuk’, udah ulih mindah pengudah iya nerima kerusi roda ari Menteri Muda Dagang Temuai, Seni enggau Main Asal Datuk Lee Kim Shin kena Hari Lima tu tadi (6 Oktober).
Lee ti diarika pemantu khas iya, Erick Chin nyuaka pemeri kerusi roda ngagai orang tuai ke diau di Rumah Panjai Bangau di Kuala Baram. Anak lelaki ngarika iya nerima pemeri nya laban Geya enda entu dapat/ gerai jam nya.
“Tiga minggu ke udah, lebuh Datuk Lee ngatur pejalai ngagai menua ulu, pengari rumah panjai udah minta kerusi roda ti kala dikena ungkup indai tuai berindik ari gaya pengerai iya.
“Taja pia, laban mar ngiga kerusi roda ti udah dikena agi manah, kami meli ke iya baru,” ku Chin.
Ku iya nambah, kerusi roda nya siti ari 40 buah kerusi roda pemeri ari Lee ngagai Sepital Miri, Poliklinik Tudan, Poliklinik Miri enggau MRC Chapter Miri.
Ba lansa ke sama, Chin mega bisi nyuaka bantu ngarika Datuk Lee Kim Shin ngagai Ketuai genturung pendiau Kampung Muhibbah, Nordin Yussuf, ke alai rumah iya udah angus kena Hari Tiga (4 Oktober) tu tadi.
“Taja bantu tu nyangka enda mayuh, tang kami ngarapka iya ulih ngelempungka tating belanja sida Nordin sebilik dikena ngentak baru rumah sida,” ku Chin.
Nitih ku penerang, Datuk Lee mega bisi meri ramu rumah, plywood, ngagai Nordin dikena ngaga dampa seraya nganti ngentak baru rumah iya.