Urung 3,000 pedagang ba Sibu udah berejister nama ba RUS

SIBU: Urung 3,000 iku orang dagang ba sitak Sibu diatu udah mujur ngerejister nama sida ba Program Rakan Usahawan Sarawak (RUS).

Chairman Kaunsil Orang Dagang Sitak (MPUB) Sibu Wong Hee Sieng madah, penyampau tu nyengkaum orang dagang ba pelilih Kanowit enggau Selangau.

“Kitai chakah deka meda orang dagang lebih agi di Sibu ditu bela ngerejister nama ba RUS baikka nengah Opis Residen, Opis Bekuasa Kandang Menua, MARA tauka ejensi ke bukai ti bekaul enggau pengawa dagang,” pia ku iya madah maya berandau enggau pengarang berita ditu, kemari.

Dulu agi ari nya iya dipebasa bejadi Pengerami Nutup Program Jerayawara Keusahawanan dan Kursus Hasilan Otoshimi dan Hasilan Sos ba Dewan Lakis Sitak Sibu ditu, kemari.

Bela datai maya tu Ketuai Seksyen Pemansang Kapasiti Industri Mit enggau Jelan Pemesai Opis Menteri Pemansang Industri enggau Orang Dagang Rozaini Mohammad Zahir.

Nerang enggau nyemetak, Wong madah, RUS dikena ngerikod penerang bekaul enggau orang dagang ngambika perintah nemu penyampau sida enggau nama bagi dagang ke dikereja ba tetiap bengkah sitak di nengeri tu.

Ari penerang nya ku iya, perintah deka lantang berundingka pengawa nyaup ngemansangka dagang sida.

“Nya alai, ba RUS, penerang ke silik orang dagang deka dirikod kelimpah ba ditu peminta tauka pekara bukai ti ditapi orang dagang bela deka ditemu,” ku iya madah baru.

Ba pekara bukai, MPUB ku iya, sebengkah kaunsil ti baru ditumbuhka alai sebedau tu nama kaunsil tu iya nya Opis Pemansang Orang Dagang Bumiputera.

“Diatu kaunsil nya digaga baru ngambika semua bansa bela ngasaika penguntung ari MPUB,” pia ku iya nerang.

Maya ke bejaku ba mua bala mayuh, Wong minta orang dagang ditu berengkah ngubah singkang sida deka berunding jauh agi ari ngelama tu ba pekara ngangkatka asil dagang sida.

Tu ku iya, nyengkaum beambi ulih ba pemansang dunya baka ngelakuka barang nengah pemansang internet.

“Kitai meseti landik berunding tang ukai semina agi bepanggai ba chara lama bejualka produk.

“Enti suba, penguntung bejualka barang nitihka pengelaku ba endur bejual aja. Tang enti kitai ngena internet orang ke meli barang ukai semina ba menua tu aja tang deka dibeli orang ari menua bukai mega,” ku iya sambil madah pengelandik ngelaku produk nengah internet enda semina dikereja nembiak aja tang mega nyengkaum sida ke tuai bela tau bekenaka teknologi nya.

Kus ke digaga berengkah 5-6 Oktober nya digulu 100 iku orang dagang ba Sibu ditu.

Ba program pemandang ti bela diatur berebak kemari mandangka 12 bengkah ejensi bisi datai ngulu program nya ti bela mungkur penyampau 400 iku penyereta.