Pengawa meri penyedar pasal ngintu rampa menua patut diterenak tumu

SARIKEI: Pengawa meri penyedar pasal pemesai guna nyaga enggau ngintu pemeresi enggau rampa menua patut diterenak tumu, kelebih agi ba raban nembiak.

Chairman Kaunsil Pelilih Sarikei (MDS), Wong Zee Yeng madah, diatu perintah udah bejalaika mayuh macham pengawa dikena nentuka rampa menua seruran diintu, ukai semina dipejalai nengah sida chara aja, tang mega nyengkaum bemacham pengawa, chara enggau atur.

“Siti ari pengawa ti chakah dipejalai kenyau ari suba iya nya bejalaika program Kitar Semula tauka ‘ Inno Waste’, ke alai iya mega diterenak nengah pejalai kimpin, karnival sereta pengawa ke bukai.

“Kesemua program ti dipejalai tu tuju iya nabur penerang sereta nerenakka penyedar pemesai guna gaya idup gadung enggau aplikasyen teknologi gadung ba pengidup besehari sehari sereta mega pemesai guna ngemeranka ulah ngena baru barang.

“Kitai dekaka tetiap serak komuniti patut sedarka tanggungpengawa enggau pangku pengawa ngagai rampa menua ti nyadi tanggungpengawa begulai nentuka tetiap pengawa nya ulih ngurangka pangka negetif enggau meri pangka positif ngagai rampa menua asal,” ku Wong.

Iya mansutka jaku nya rambau program Bengkel Inno- Waste diatur MDS enggau kerejasama Opis Menteri Kaunsil Kandang Menua enggau Pengawa Berumah Sarawak di Balai Sentral Sarikei, kemari.

Program tu udah digulu lebih 150 iku datai ari bala nembiak sekula sereta mega pengari ari gempung ukai dikuasa perintah ( NGO).

Nitih ku Wong, program tu diatur ngambi meri penyedar ngagai mensia mayuh pemesai guna ngintu rampa menua sereta nerenakka semangat angkunka rampa menua ngagai bala komuniti.

Berebak enggau nya ku Wong, program tu mega nyadi kolabrasyen antara sektor perintah, peribit enggau komuniti dikena negutka agi pemanah kaul.

“Program tu mega bela menggi pangku pengawa meri penyedar ngagai bala komuniti ba pengawa ngasilka produk ari barang ti udah dikena nengah Konsep 3R iya nya ‘ Reduce, Reuse, Recycle’.

“Baka ti udah ditemu semua, piak Kaunsil Kandang Menua udah dilempaika tanggungpengawa ngatur uras ( sisa pepejal).

“Penyampau uras ti majak nambah ketegal penyampau tubuh peranak ti nambah. Nyema penangul tu enda diatur memanah deka ngasuh rampa menua kamah.

“Nya alai program penyedar ke bansa tu patut seruran bisi dipejalai,” ku Wong nandu nyemetak.

Sama bisi datai Sapit Chairman MDS, Kaunsilor Awangku Ibrahim enggau Sekretari MDS, Henry Jalin Watt.