Ketuai raban bansa meseti regas mai nembiak baum ngatur pemansang
SRI AMAN: Kaban Kunsil Nengeri (ADUN) Bukit Begunan, Datuk Mong Dagang ngelalau semua ketuai raban bansa ditu patut terus bejalaika tanggungpengawa ngemansangka tumpuk pendiau enggau rumah panjai diri.
Ku iya, bala ketuai raban bansa ti megai pangku pengawa nyadi temenggong, penghulu, tuai rumah, ketuai tumpuk pendiau, kaunsilor enggau ke bukai patut bela nyaup pengawa bala ketuai ke ngiring nengeri, kelimpah regas ngatur aum enggau bala nembiak redak diri.
“Nengah aum ke diatur, iya deka ngemujurka semua pejalai perambu pemansang ti deka dipejalaika ba kandang menua kita,” ku iya.
Iya mansutka jaku tu lebuh bejadika Pengerami Makai Lemai Komiti Pemansang enggau Pengelikun Genturung Pendiau (JKKK) Rumah Siti Amid, Jumbit Melugu Scheme, Sri Aman bepalan di Balai Suarah ditu, apin lama ke udah.
Ku iya, nengah aum begulai enggau bala ketuai ba tetiap tumpuk enggau rumah panjai, semua penerang bekaul enggau pemansang sereta penanggul ditapi sida deka ditemu sereta ulih diputar.
Tandu iya, bala ketuai mega patut nitihka pejalai polisi perintah ke alai sida patut nemu sereta meretika pekara kemaya hari dikena nentuka semua perambu perintah ba tumpuk pendiau tauka rumah panjai nerima kerejasama sereta mujur.
“Kitai enggaika perambu perintah ungkup sekeda menua tejanggal tauka dibatak pulai ketegal enda diterima peranak menua nya lalu ngujungka peranak dia deka rugi dalam timpuh lama.
“Nyadi ketuai, kitai patut ngena awak diri empu nentuka perambu kitai mujur,” ku iya.
Berebak enggau nya, iya mega ngelalau sereta ngarapka semua ketuai ulih nentuka rayat terus nyukung perintah enggau bala ketuai ke bisi diatu ngambika semua projek pemansang ti diperambu enggau ti deka dipejalai bejalai enggau lanchar.
Sama bisi datai Pemesai Opis Pekara Khas (JASA) Sarawak, DUN Bukit Begunan, Jesi Bintoh sereta bala ketuai raban bansa ke bukai.