Abg Johari keran mai S’wak nyapai tikas ke lebih tinggi
Sekumbang 10 bulan udah nyadi Kepala Menteri dia iya keran mai Sarawak ngemeratka pengawa digital
KUALA LUMPUR: Kepala Menteri Datuk Patinggi Abang Johari Tun Openg berupai nyapai pemujur sekumbang 10 bulan udah iya ngisi penuduk ti ditinggalka niang Pehin Sri Adenan Satem.
Sarawak deka ngangkatka penyambung nya, lalu kitai ngadaka mayuh agi tiang telekomunikasyen, ngemanahka agi sambung fiber optic ungkup peneras internet manggai empat terabite enggau ke bukai. Datuk Amar Douglas Uggah Embas Sapit Kepala Menteri Sarawak
Nitih ku sapit iya, Datuk Amar Douglas Uggah Embas, Abang Johari deka mai Sarawak nyingkang ngagai tingkat siti agi nengah juluk iya, ti ngemeratka pengawa digital ngagai nengeri sereta ngenegapka ekonomi nengah pengawa bekenaka teknologi pemadah enggau arus penyambung (ICT).
“Sarawak deka ngang- katka penyambung nya, lalu kitai ngadaka mayuh agi tiang telekomunikasyen, ngemanahka agi sambung fiber optic ungkup peneras internet manggai empat terabite enggau ke bukai,” ku Uggah rambau pengawa bejadika Lan Berambeh di Putra World Trade Centre (PWTC), ditu, kemari.
“Diperambu RM1 biliun udah diagih dikena ngangkatmanahka infrastruktur ICT enggau perintah nengeri mega udah ngadaka inkubatir dikena numbuhka kompeni ti deka ngaul diri dalam dagang bepelasarka ICT.
Uggah ti bejaku rambau pengawa bejadi nambah, perintah nengeri mega minta pulai baru Tekat Ai Bakun ari perintah besai, lalu numbuhka bank pemansang iya empu sereta kompeni gis enggau minyak.
“Semua pengawa tu deka mai nengeri tu ngagai tikas tinggi agi, laban kitai deka ngenegapka rayat nengah peluang ngelingi ti manah agi,” ku Uggah.
Nyadi pengawa ninting taun ngagai perintah nengeri betemu enggau peranak Sarawak di Semenanjung Malaysia, Lan Berambeh nyadi palan ke alai bala ketuai deka ulih betemu enggau rayat ditu lalu nerangka sebarang polisi enggau pemansang ti udah diperambu.
Dulu agi ari nya, Kaban Kunsil Nengeri ( ADUN) Tupong, Fazzrudin Abdul Rahman ngatur ‘Randau’ begulai enggau sekeda menteri besai ari Sarawak.
Antara panel iya nya Sapit Menteri Bumai enggau Industri Betanam Betupi Dato Anthony Nogeh, Menteri Pengatur Pengereja Pengawa Datuk Seri Richard Riot Jaem, Menteri Orang Indu, Ruang Bilik enggau Pemansang Komuniti Datuk Seri Rohani Abdul Karim, Menteri di Opis Menteri Besai Datuk Joseph Entulu enggau Menteri Kaunsil Kandang Menua enggau Pengawa Berumah Datuk Dr Sim Kui Hian.
Sama bisi datai bala menteri ari Sarawak, bala ADUN enggau pemesai ejensi perintah ke bukai.