Tsunami politik bansa Dayak, Melayu disadang berubah ketegal pangka ekonomi

KUCHING: Gaya ekonomi ke enda manah ti udah mai empas ba pengidup peranak nengeri tu tau ngujungka undi Barisan Nasional (BN) ulih ngalih ngagai Pakatan Harapan(PH).

Bejaku ba Forum New Deal New Hope ditu kemari, Chairman PH Sarawak Chong Chieng Jen madah pemerinsa pengidup ketegal empas ba pekara ekonomi nya disadang mai tsunami politik ba bansa Dayak enggau Melayu.

“Aku pechaya mayuh bansa Dayak enggau Melayu ti bepelajar macha pekara politik tauka ekonomi ke nyadi ba media rama.

“Sida nemu pekara ke amat nyadi lalu berasai enda lantang,” ku Chong.

Iya ke mega Chairman DAP Sarawak nambah gaya ekonomi ke enda manah maya ke diatu bela ngasuh orang dagang bansa China enda lantang.

Ku Chong, sida ke kereja makai gaji pan ngasai pemerinsa ngulihka pemisi belanja ke alai dagang kedai kupi majak nurun.

“Bansa Dayak ke diau di ulu ngasai rega barang majak mar ninting hari, ninting minggu.

“Semua penusah tu mai pengirau ba ati rayat,” ku iya ke mega ADUN Kota Sentosa enggau MP Bandar Kuching.

Kelimpah ari nya, Chong mega pechaya pemutus Tun Mahathir ti ngalih ngagai PH ngelaban UMNO deka mai empas besai ba politik menua tu.

Iya pechaya deka bisi ubah ba perintah pengudah pengawa bepilih ti deka datai.

“Kitai bedau ulih madah diak tsunami politik deka nyadi ba bansa Dayak tauka Melayu. Tang pekara tu ulih dipeda pengudah tembu pengawa bepilih ila,” ku iya.

Bela datai ngulu forum Sapit Chairman Parti Keadilan Rakyat (PKR) Sarawak See Chee How enggau MP Kluang Liew Chin Tong.