Pemutus peresa UPSR bedau ngemantup ati
Semua piak bekaul dipinta berundingka chara engkeman ngangkatka penyulut nembiak ba peresa nya
BETONG: Gerempung Apai Indai enggau Pengajar (PIBG), Opis Pelajar, pengajar enggau apai indai di bagi menua tu, dipinta berundingka chara engkeman dikena ngangkatka pelajar enggau penyulut nembiak ke ngambi peresa perintah.
Sapit Kepala Menteri, Datuk Amar Douglas Uggah Embas madahka, nya berindik ari gaya pemutus peresa perintah lebih agi ba Ujian Penilaian Sekolah Rendah (UPSR) ngayanka pemutus peresa ti enda ngemantupka ati.
Ambika banding ku Uggah, ba taun 2015 pemutus peresa UPSR 2015 bisi 36 iku nembiak teulihka semua A tang ba taun 2016 semina seiku aja teulihak semua A ba peresa UPSR.
“Aku deka mai Robert Lawson Chuat (ti kala nyadi ADUN Bukit Saban) sereta bala pengajar, apai indai, PIBG sereta opis pelajar ngatur siti randau dikena kitai ngiga tauka nentuka nama kebuah pemutus peresa sekula baka nya.
“Kitai enda tau enda berandau ke tu, laban orang di menua bukai ulih teulihka peresa ke manah lalu nadai kebuah kitai enda ulih.
“Kitai enda tau enda bebendar mutarka penanggul tu awakka anak kitai ulih maju, mansang sereta nyulut dalam sekula,” ku iya.
Uggah ti mega Kaban Kunsil Nengeri (ADUN) Bukit Saban mansutka pekara nya lebuh ke ngulu pengerami serumpu makai malam ba SK St John Nanga Tiga, Ulu Layar ditu, ensanus.
Kelimpah ari nya lebuh ke ngenang pasal pemansang betanam betupi, Uggah meransang orang betanam betupi ngambika ukai semina ngemeranka pengawa betanam sebansa utai tanam aja.
Iya bepenemu orang betanam betupi patut ulih nanam dua tiga bansa utai tanam dikena napi gaya ekonomi ti enda meruan sereta dikena nyungkakka penatai pemisi ruang bilik.
“Kitai anang arapka siti ginti aja, tan dua tiga iti ginti. Tang aku meda kitai ditu (menua Ulu Layar) manah amat laban ngetan dua tiga iti ginti baka betanamka sawit, lada sereta getah.
“Aku ngarapka kitai di menua ulu tu ulih berundingka projek bukai mega laban opis menteri ke dipegai aku bisi nyendiaka siti projek ke nyamai diadu sereta dijaga iya nya nupi engkelulut.
“Aku minta ketuai pating enggau kaban komiti ranting berandau enggau peranak rumah panjai ngenukuka berapa iku ke bisi ati deka bejalaika projek nupi engkelulut, laban ke diatu madu engkelulut chukup berega,” ku iya ti nyadi Menteri Betanam Betupi Moden, Tanah Adat enggau Pemansang Kandang Menua.
Nambahka nya iya madahka opis menteri iya bisi nyendiaka palan endur ngumpul asil betanam betupi nyengkaum palan ngumpul buah rian dikena mantu orang betanam betupi menua tu.
Sama bisi datai ba pengerami serumpu makai malam SK St John Nanga Tiga, Ulu Layar ke diatur PIBG sekula nya, Robert Lawson Chuat ti kala nyadi ADUN Bukit Saban enggau ke bukai.
Kitai enda tau enda bebendar mutarka penanggul tu awakka anak kitai ulih maju, mansang sereta nyulut dalam sekula. Datuk Amar Douglas Uggah Embas Sapit Kepala Menteri Sarawak