IBRACO nempa kerejasama enggau Hope Place mantu orang tusah
KUCHING: IBRACO nempa kerejasama enggau Hope Place ba pengawa mantu peranak tauka ruang bilik ke amat suntuk tauka idup tusah ba nengeri tu.
Kepala Menijar IBRACO, Datuk Chew Chiaw Han madahka, nya sebengkah ari tanggungpengawa rama korporat (CSR) ke dipejalaika IBRACO.
“IBRACO ngaga pemutus sereta setuju nyadika Hope Place bakih bejalaika pengawa pengasih, berindik ari pengelandik NGO tu ti ngenukuka pemeri tauka bantu nya diberi ngagai orang ke amat patut.
“Tu mega sebengkah ari chara kami (IBRACO) meri pulai baru tauka mantu mensia mayuh lebih agi orang sesiku ke amat suntuk.
“Nya seharitu kami (IBRACO) nempa kerejasama enggau Hope Place dalam pengawa mantu orang ke suntuk tauka timpang pendiau nengah pengawa nyendiaka sebuah ari IBRACO 3-storey TT3 Commercial Centre shop office enggau enda bebayar ngambika bisi endur NGO tu ngagihka bantu ngagai sida ke patut,” ku iya.
Chew mansutka pekara nya dalam aum pengarang berita pengerami nyuaka opis Hope Place ulih Datuk Chew Chiaw Han ke diatur IBRACO ba TT3 Commercial Centre, Tabuan Tranquality ditu, kemari.
Pengawa nentuka penerima bantu ke patut dipejalaika Hope Place nengah pengawa ngerandau seraya mansik lalu bantu nya semina diberi ngagai orang ke amat nitihka kriteria ti ditetapka.
Gaya pengelantang enggau pengidup penerima nya deka dipansik tauka diperesa baru ba tengan taun sereta nyema tikas pengidup bisi meruan, bantu nya diketuka.
Tulung ke diberi ngagai penerima baka barang ke dikena tiap hari, ngemanahka rumah ke udah jai sereta nulung orang ti kena penusah ampuh bah enggau angus.
Nitihku Presiden Hope Place Chong Hai Eng, Hope Place bisi meri bantu tauka pemeri sejarit ngagai beberapa ruang bilik ti suntuk baka meri barang ke diguna tiap hari tauka mata duit.
“Naka ke diatu, Hope Place bisi nyaga urung 188 ruang bilik suntuk di mengeri Kuching ti begunaka belanja urung RM23,000 tiap bulan sereta dipelabaka penyampau nya deka nambah.
“Barang ke diguna tiap hari ke diberi Hope Place nyengkaum beras, milo, garam, minyak ke bepanduk, pampers orang besai tuai enggau nembiak mit, sereta tusu khas baka Ensure, Enercal & Pediasure & Nutren fibre.
“Sehari tu penerima tauka orang ke dibantu Hope Place, bala nembiak mit bisi diberi beg sekula enggau kereban sekula ari IBRACO enggau beras.
Orang mayuh ke deka meri bantu tauka nyaup Hope Place mantu ruang bilik ke suntuk sekalika ngena mata duit tauka barang, tau nganjung bantu nya ngagai opis baru HOPE PLACE ba Sublot 25, TT3 Commercial Centre, Tabuan Tranquility ke dibuka tiap Isnin - Jumaat pukul 8.30 pagi - 5.30 lemai sereta hari Sabtu ari pukul 8.30 pagi - 12.30 tengahari.
Sebarang tanya bekaul enggau tu tau telefon ngagai Hope Place ba lumur 013-5672775 enggau 082- 505987 tauka facebook Hope Place.
Sama bisi datai kemari pemungkal Hope Place, Kelvin Wan.