SJK Bintawa champion ‘Cardbord City Challenge’
KUCHING: Sekula Primari Bansa (SJK) Bintawa dipadu nyadi champion pekit ‘Cardboard City Challenge’ pengudah barang ditempa sida, ‘Time Machine’ narit ati lima iku akim profesional di Borneo 744 kemari.
Diatur nyadi sebagi ari Cardboard City Play Day nyerumba World Architecture Day 2017, SJK Bintawa mujur ngalahka 11 buah sekula bebida ti ngambi bagi dalam pekit ti berengkah diatur ari 4 ngagai 6 Oktober.
“Mengeri futuristic (Time Machine) betingkah enggau langkar arkitek asal,” ku pengari SJK Bintawa, Alice Ung lebuhka dirandau the Borneo Post kemari.
Ku iya nambah, bisi 30 iku nembiak ngambi bagi dalam pekit tiga hari berunggu nya enggau runding ‘di luar kotak’ ngelangkar sereta nempa mengeri ari cardboard enggau tap dalam kandang 15 kaki meter persegi pemesai.
Pengajar ke bukai, Chung Siaung Fui madah langkar udah ngaum jemata ti nyadi tiang ‘Time Machine’ ti nyambung peranak ari mengeri lama ngagai mengeri dudi hari.
Berindik ari pemenang nya, SJK Bintawa pulai ngemai perais mata duit RM300 enggau sekeda set jemari cardboard replika kelas abad ke-21 ti disuaka Sekretari Politik Kepala Menteri Tan Kai, ti ngarika Menteri Kaunsil Kandang Menua enggau Pengawa Berumah Datuk Sim Kui Hian.
Tuju pekit tu nitih ku pengatur, Malaysian Institute of Architects Sarawak Chapter (PAMSC) meransang pelajar nengah main kreatif enggau aspirasyen runding nembiak nengah peneleba spatial.
Tetiap iti penyereta pekit udah ngena kutak cardboard ti dikena baru, bala nembiak mega deka belajar pasal pengawa bekenaka baru barang lama laban sida deka muai barang ti digaga sida ba hari kepenudi pengawa mandang ti diatur berengkah ari 7 ngagai 8 Oktober (sehari tu).
Kesemua 240 iku nembiak ari 12 buah sekula di menua tu udah ngambi bagi nempa sereta nirika mengeri ngena imaginasyen sida empu ti disaup 120 iku pelajar design ari kolej enggau universiti menua tu.
Sekula bukai ke bisi ngambi bagi dalam pekit iya nya SK Lumba Kuda, SJK Chung Hua No.6, SK St Mary, SJK Chung Hua Pangkalan Baru, SJK Chung Hua Stampin, SK Tabuan, SK Sungai Stutong, SJK Chung Hua No.5, SJK Chung Hua Batu 7 Matang, SJK Chung Hua Batu 4 1/2 sereta SJK Chung Hua No.1.