Komuniti ba genturung pendiau meseti dulu nemu mutarka tasah

KUCHING: Lebuh bisi penusah enda disadang baka ampuh bah, komuniti ba sesebengkah genturung pendiau nya enda tau enda nemu mutar sebedau piak bekaul datai ngesah.

Menteri ba Opis Menteri Besai Dato Seri Dr Shahidan Kassim madah, Agensi Pengatur Tasah Menua (NADMA) enggau Unit Pengelikun Menua (UKN) enda tau enda beratika tumu, baka pemakai enda tau enda disediaka besemak enggau sitak ke (tasah) napi tasah, lalu kitai mega enda tau enda beratika sitak tu bisi insuran nambika sida ke napi tasah nya, ulih dibayar perintah pampas.

“Pengawa UKN lebuh ba endur ke napi tasah, peratika endur pengentap sementara sereta pemakai nya diputar enggau manah nyengkaum bala anak mit enda tau enda dijaga enggau manah, semua utai tu enda tau enda dirikod maya bisi tasah,” ku Shahidan.

Iya madah munyi nya lebuh bejaku ba aum media pengudah ngepunka ‘Bulan Kesiapsiagaan Nasional 2017’, ngarika Sapit Menteri Besai Dato Seri Ahmad Zahid Hamidi, di Kuching Waterfront ditu, kemari.

Iya madah UKN, Opis Kepala Menteri ngepunka program tu di menua Sarawak, ke betuju ngaga endur nya ‘Free from Fear’ba rayat kitai, enggau chara meri penemu sereta pengelandik sida iya mutarka mayuh macham perengka guna (tasah), bebadi, mantu dalam pengawa berubat, ngiga sereta nyelamat.

Kelimpah ari nya, iya mega madahka Sarawak mega nyadi chunto ke pengabis manah ba program CERT (Community Response Team) nya ti di spunsa ulih Petronas, komuniti di Sarawak aktif dalam ngangkatka pengawa CERT nyadi ( atur tumu) napi tasah.

“Baka CERT, iya nya komuniti ba sesebengkah sitak nya, komuniti dia tentu ngelala sapa bagi komuniti diri empu.

“Chara ngatur digaga di renggat ke baruh agi, di renggat komuniti, genturung pendiau, rumah flet, sekula, universiti, ba barang endur mayuh mensia diau, deka ngembuan CERT.

“Sebedau bantu datai, CERT udah bisi,” ku iya.

Kelimpah ari nya, iya madah tuju pemerat ngatur atur pengawa tu mega ngambika komuniti besedia napi ampuh bah sereta komuniti nemu ni bagi ijinsi tauka NGO nyengkaum kompeni swasta ke deka mantu mensia mayuh maya napi penusah ampuh bah.

“Perintah Nengeri Sarawak udah dibagi penambah aset lalu aset tu deka ditambah jemah ila, Perintah Besai seruran enggau naka ulih mantu perintah nengeri ngangkatka penyendia napi tasah sereta betatika sukut pengelikun sereta mantu dalam ngulihka aset bantu maya tasah” ku iya.

Ba atur pengawa nya kemari, iya madah ke menua Sarawak aja, Perintah besai udah nganjung 8 buah trak 5- tan enggau dua buah bot ‘ amphibious sealeg’ lalu ba atur pengawa kemari, sebuah bot ‘ amophibious sealeg’ diserah ngagai Komiti Mutarka Penusah Ngenyit Sarawak, ti betuaika Sapit Kepala Menteri Datuk Amar Douglas Uggah anak Embas.

Shahidan ti mega nyadi menteri megai tanggung- pengawa nyaga tasah menua madahka meri jaku selamat ngagai Perintah Nengeri ke mujur nyaga kampung menua tu.

“Meri pengaga ati ngagai Perintah Sarawak ke mujur ngetanka sida ke galak endar bechurika kayu sereta Printah Menua Sarawak mega meri atur ke terit ba SOP (Standard Operating Procedure) ngagai sida ke dikemendar ngereja pengawa kayu.

“Dalam timpuh nya mega, pengawa nyaga kampung nengah pengaea nanam pun kayu, dalam pekara tu ku iya, Perintah Besai deka mayuh agi mantu pengawa nyaga kampung menua tu, laban kampung tu berat.

“Nyangka dalam pengawa bansa tu belanja kitai besai, kena ngaga metigasi ampuh bah, enti ai datai nadai ‘brek’ agi, baka entukar nurun ari bukit, nadai brek, deka nurun enggau laju.

“Ampuh bah, tauka ai ke nurun ari bukit deka nurun enggau jampat, lalu nadai utai bukai ke ulih nyekat iya (nadai kampung), laban pemisi kampung, ai ke nurun ari bukit nya ulih dikuntrul (semula jadi),” ku iya, ke ngarapka Komiti Mutarka Penusah Ngenyit Sarawak, baka ke kala dipadah Sapit Menteri Besai, Dato Seri Ahmad Zahid Hamidi, Sarawak ngemutarka tasah menua tu mujur nyapai 5 Bintang .

Ba lansa bukai, iya madah ampuh bah enti dibanding enggau ke kala nyadi dalam urung taun 1967 (manggai urung 50 taun ke udah), ke taun tu enti nitihka Opis Metereologi, dipelabaka deka napi ujan lebat dalam bulan November, lalu ni naka penyuah tu deka dipadah belama.

“Nya alai, kitai deka nyen- diaka diri…komuniti mega enda tau enda nyikap diri di sitak ke seruran ampuh bah sereta enda napi ampuh bah.

“Ari sukut teori, kitai nyikap diri di sitak ke biasa napi ampuh bah enggau enda biasa napi ampuh bah di serata menua,” ku iya.

Sama bisi datai, Sapit Kepala Menteri Datuk Amar Douglas Uggah Embas ti mega nyadi chairman Komiti Mutarka Penusah Ngenyit Sarawak, Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah, Kepala Direktor NADMA, Dato’ Abd Rashid Harun, enggau Sapit Sekretari Perintah Sarawak (Transformesyen Menua Pesisir) ti mega nyadi Sapit Chairman Komiti Mutarka Penusah Ngenyit Sarawak.