Tanah adat bansa Dayak majak mayuh alah dipechara, PMPG lalu empai teputar

KUCHING: Parti Bansa Dayak Sarawak Baru (PBDSB) enda lantang enggau berita sentang tanah adat bansa Dayak majak mayuh dirampas pengudah alah dipechara.

Presiden PBDSB Cobbold John madah tetiap kali kes tanah dipechara ba Kort Federal, Dayak suah alah tajapan udah menang ba pechara di Kort Majistret Nengeri.

“Kort Federal meri pemendar ngagai Opis Kmpung enggau Perintah Nengeri ngapil, lalu ngalahka hak bansa Dayak ba tanah NCR, pemakai menua tauka pulau galau.

“PBDSB ngasai bansa Dayak masau mayuh duit ketegal ti melanja ungkus pechara ba Kort Federal, ketegal deka ngenanka pemakai menua enggau pulau galau.

“Sida ngelaban Perintah Nengeri enggau kompeni ti numbuhka sawit ba tanah nya,” ku iya nengah surat penerang berita kemari.

PBDSB ku Cobbold setuju enggau penemu raban Dayak Think Tank Group (DTTG) ti madah pengudah semilan bulan pansik dipejalai, isu ke bekaul enggau pemakai menua enggau pulau galau ( PMPG) mengkang enda diputar.

Ku Cobbold, PMPG udah dikemeran Dayak dalam timpuh 200 - 300 taun ke udah, iya nya sebedau undang-undang dituku di Sarawak.

“Diatu PMPG tu ditetap ‘ NO Force of Law’ lalu ngasuh Dayak balat ringat.

“Tu mih ikas basa ke diberi Perintah Nengeri enggau Perintah Besai pengelama 54 taun ke udah, ketegal tu PMPG udah dibuka ungkup tuju komersyel,” ku Cobbold.

Pemutus Kort Federal ku Cobbold ukai chara mutarka isu ke bekaul enggau tanah NCR bansa Dayak di Sarawak.

Pemutus nya deka ngepunka laya entara komuniti Dayak enggau ijinsi perintah sereta kompeni.

“Nyentuk ngagai diatu, Perintah Barisan Nasional(BN) Nengeri lalu enda mutarka isu PMPG ke alai sida mega enda meretika konsep berimba enggau bekebun Dayak,”ku Cobbold nandu.