Perintah S’wak udah mayuh bejalaika projek tekat bah
Entara projek nya sistem baraj ba sungai Sarawak, Projek Tekat Bah Sibu, Pump Gate di Bau sereta Tekat Ai Bengoh
KUCHING: Perintah Nengeri tu udah ngaga mayuh macham projek tekat bah di serata menua, dikena ngemutarka penanggul bah nuntung menua tu kelebih agi lebuh maya musin landas.
Kepala Menteri Datuk Patinggi Abang Johari Tun Openg madah entara tekat ampuh bah nya, Nyaga Sungai Sarawak ngena sistem baraj, Projek Tekat Bah Sibu, Pump Gate di Bau sereta Tekat Ai Bengoh, entara pengawa dikena mutarka penanggul ampuh bah di Sarawak kelebih agi di mengeri besai nyengkaum Kuching, Sibu, enggau Bau, ke digaga dalam timpuh ke panjai.
Sistem baraj di Sungai Sarawak ngembuan pengulih nyaga penyampau ai sungai ke anyut maya musin Monsun Timur Laut sereta ujan bangat ari selama, sereta nyemela tikas ai sungai lalu ngurangka penusah bah.
“Perintah Nengeri ngarapka mayuh agi projek baka tu digaga di Sarawak kelebih agi di sitak ke suah dituntung ampuh bah,” ku Abang Johari.
Iya madah munyi nya nengah teks ke dibacha Sapit Kepala Menteri, Datuk Amar Douglas Uggah Embas ti mega nyadi chairman Mutarka Penusah Ngenyit Sarawak ba atur pengawa ‘Bulan Kesiapsiagaan Nasional 2017’ti dipenyadi Menteri ba Opis Menteri Besai, Dato Seri Shahidan Kassim (ngarika Sapit Menteri Besai, Dato Seri Ahmad Zahid Hamidi) ba Kuching Waterfront ditu, kemari.
Iya madah perintah nemu pasal guna pengereja pengawa ba sesebengkah endur nyaup enggau pemerat ke komuniti sida iya sama enggau besedia napi penanggul ampuh bah.
Bepelasarka pemerat nya, iya madah dalam taun 2010, ‘Community Emergency Respond Team ‘ (CERT) udah ditumbuhka, ku iya.
“Raban tu nyadi seraban komuniti ke deka nyaup ba pemun tasah nya nyadi sebedau ijinsi penyelamat datai,” ku iya.
Program CERT tu dipelanja Petronas , ke nyadi sebagi ari tanggung pengawa korporat sida iya setiap enggau pemerat
Perintah Nengeri ngarapka mayuh agi projek baka tu digaga di Sarawak kelebih agi di sitak ke suah dituntung ampuh bah. Datuk Patinggi Abang Johari Tun Openg Kepala Menteri Sarawak
Petronas mantu pengelantang pendiau sereta pemansang komuniti.
Ari taun 2015, Petronas udah bejalaika kerejasama enggau Unit Pengelikun sereta Atur Kuasa Menua, Opis Kepala Menteri, Angkatan Pertahanan Awam Malaysia, Opis Bomba enggau Penyelamat Malaysia sereta Polis Diraja Malaysia ngaga CERT.
Naka diatu, urung 1,500 mensia mayuh udah dilatih nyadi raban CERT baruh spunsa Petronas, lalu ke taun tu Petronas udah ngungkupka urung RM1 juta nyadi wang turu kena ngaga program CERT di serata menua Sarawak.
Ba lansa bukai, Abang Johari ti mega nyadi Menteri Wang enggau Perambu Ekonomi madahka kena napi sebarang tasah nyadi, penyereta Gerempung Ukai Dikuasa ulih Perintah (NGO) berat endar dalam meri bantu sereta tulung kena beratika pengawa mantu nya bejalai enggau lanchar.
“Nya alai, kami ngelalau mayuh agi raban NGO sereta mensia mayuh bukai, datai, mantu ba barang bantu ke patut.
“Bantu sereta tulung tu berega endar ba Perintah nyengkaum ba sida ke kena tinggang tasah nya,” ku iya.
Kelimpah ari nya, Abang Johari ti mega nyadi Menteri Pemansang Nengeri enggau Pengeraja Asal madahka, kena 5 Januari 2016 tu tadi, Komiti Mutarka Penusah Ngenyit Sarawak diberi lima bintang ulih Sapit Menteri Besai Dato Seri Ahmad Zahid Hamidi , ketegal chara Sarawak ngemutarka tasah ampuh bah ke nuntung menua tu bulan Disember 2015.
“Japai tu asil kerejasama ke mujur ari semua ijinsi ke sama mantu Mutarka Tasah Menua tu,” ku iya.
Ba lansa bukai, iya madah Perintah Menua udah meri ungkup ngagai komiti tu kena meli Drone sereta penyendia perengka guna kominkasi HF/VHF.
“Drone tu ngemuntangka agi pengawa ngemata tauka beratika ari pemun ngemataka sitak ke suah dituntung ampuh bah tang nadai jalai ngagai sitak nya. Penyendia perengka guna komunikasi HF/VHF nyadi perengka guna komunikasi alternative lebuh bisi tasah,” ku iya.
Ba atur pengawa nya kemari, Shahidan ngarika Ahmad Zahid meri pangkat ‘Watikah Perlantikan Pegawai Kehormat Agensi Pertahanan Malaysia’ alai, Uggah diberi pangkat Sapit Komiti Dipebasa Penyaga Periman, Menteri Pengelantang Pendiau, Komuniti, Ruang Bilik enggau Pemansang Anak Mit, Dato Sri Fatimah Abdullah diberi pangkat Penulung Pesuruhjaya Kehormat (Pertahanan Awam), enggau Sapit Sekretari Perintah Nengeri ( Transformesyen Menua Pesisir) diberi Pangkat Kolonel Kehormat (Pertahanan Awam), Datu Jaul Samion.
Sama bisi datai, Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah, Kepala Direktor NADMA, Dato’ Abd Rashid Harun, enggau Sapit Sekretari Perintah Menua Sarawak (Transformesyen Menua Pesisir) ti mega nyadi Sapit Chairman Komiti Mutar Penusah Ngenyit Sarawak.