Raban graduet patut ngansah pengelandik sepanjai maya

Kebuah pia laban pengelandik ke dikembuan sida tau nyadi senjata dikena napi pemar dunya

SIBU: Nembiak graduet ari Universiti College Of Technology Sarawak ( UCTS) patut berasai temegah ati enggau penemu sereta pengelandik ke dikembuan sida ti tau nyadika senjata dikena napi pemar dunya maya jeman diatu.

Nitih ku Menteri Dagang Antarabansa enggau E-Dagang Dato Sri Wong Soon Koh, sida meseti semampai ngansah pengelandik enggau penemu sida sepanjai maya ngambi nyadika pengelantang besemekih ba menua ti randaka pengelandik teknikal enggau teknologi.

“Taja pan baka nya, kita anang natak diri empu, gaga enggau pemadu manah sebarang pengawa enggau penuh pengeransing dikena nambahka pengelebih diri.

“Semua tu beguna dikena napi dunya teknikal enggau teknologi maya diatu,” pia ku iya madah.

Iya mantaika jaku tu maya Malam Graduet UCTS 2017 ba sebengkah hotel tebilang ditu, malam kilah ensana.

Pengerami nya bela digulu Mandal Chanselor UCTS Professor Dato Dr Abdul Hakim Juri enggau Sapit Mandal Chanselor UCTS Professor Dr Sabarudin Mohd, pengari kompeni ti sepunsa gelar ke diberi ngagai nembiak sereta bala bukai.

Wong ti mega Chairman UCTS maya tu madah, nembiak UCTS ke udah graduet ukai semina patut berasai temegah ati ketegal nyadi ‘produk’ UCTS tang dipinta besaup ngelaku sereta ngerembaika pemanah universiti nya.

Taja pan baka nya, kita anang natak diri empu, gaga enggau pemadu manah sebarang pengawa enggau penuh pengeransing dikena nambahka pengelebih diri. Dato Sri Wong Soon Koh Menteri Dagang Antarabansa enggau E-Dagang

“Tejuka kita ti datai ari UCTS dikelala orang bukai ba dini-dini endur kita gawa nangkan ke tu ila.

“Enda ngira ba dini endur kita udah tu, kita meseti ingatka penatai diri ke nyadi ‘produk’ ti dikemegah UCTS,” ku iya madah baru.

Nambahka nya, Wong madahka diatu sida ke baru tembu graduet nya enda agi belajar ba universiti tang deka nyingkang ngagai tikas baru iya nya begulai enggau orang bukai sereta besemekih diau ba dunya ke mayuh penguji.

Tang ku iya, pengandal tauka pechaya ke diri empu nyadika kereban beguna nyempulang tuju pengidup ngulihka nama pengingin ati.

Berebak enggau pengerami nya, Wong bela beterima kasih ngagai Abdul Hakim ti udah mujur mandangka diri ransing ngembing UCTS dalam kandang lima taun tu.

“Ari pengeransing enggau penyakah iya diatu kitai meda universiti tu udah mujur bendar kelimpah ari iya mega diatu UCTS bisi 20 lebih bengkah program,” pia ku iya sambil madah Abdul Hakim deka tembu kontrak gawa enggau universiti nya bulan Januari ti deka datai.

Maya pengerami tu, bala graduet UCTS bisi nerima macham bengkah gelar baka ‘Chancellor Award’, ‘Best Student Award 1&2, ‘Board of Engineering Malaysia’ (BEM) 1&2), ‘Industry Excellence Award’ enggau ‘University Book Award’.

Kelimpah ari nya, Wong mega bisi nyuaka geran sepenyampau RM10,000 ngagai ALUMNI UCTS.

KE PENGINGAT: Junaidi (duduk tengah) begambar kenang enggau kenang enggau bala pengari penerima geran MRP ungkup sitak Santubong di Kuching ensanus.

MUJUR: Wong (dua kiba) seraya dikemataka Abdul Hakim (kiba) enggau bala bukai maya nyuaka gelar ngagai seiku nembiak ba Malam Graduet UCTS 2017 di Sibu, malam kilah ensana.