Sitak Balingian enggau Daro begunaka bajet khas dikena ngatur pemansang
MUKAH: Sitak tebing tasik di sepemanjai Balingian dataika Daro enggau mega kandang menua besemak begunaka bajet khas ari perintah besai laban berupai agi jauh tinggal pemansang.
Kaban Kunsil Nengeri (ADUN) Jemoreng Datuk Dr Juanda Jaya madahka pengasa ati diri ke alai kandang menua nya nyadi kubu kuat Barisan Nasional (BN) kenyau ari Merdeka, tang enda entu dikeibuh.
“Ari rikod ke udah, kitai di kandang menua tebing tasik endang enda kala ngasuh lebu, tang bisi pengawa patut digaga laban enda entu dikeibuh kelebih agi ba sukut pemansang,” ku iya madah ngagai Utusan Borneo kemari lebuhka ditanya senentang pengarap ba Bajet 2018.
Nitih ku iya, bisi beberapa pekara patut dikemerat bekaul enggau isu tebing tasik, sekeda ari nya, begu- naka jalai alun ti menyana, enda relevan agi ngena feri, suntuk jelatung orang berikan enggau perengka guna makit asil tasik sereta sekula kayu ti udah luya endar, setengah abad udah didiri.
“Bisi sekula ti dipadah tuai agi ari sebarang muzium,” ku iya.
Pia mega, tebing sungai enggau tasik majak tusur patut ditekat, kelimpah bantu betanam enggau berikan ti intensif agi.
“Laban bantu belanja idup ngagai orang bumai tauka nelayan enda deka mutarka penanggul (seranta di menua pesisir), patut agi ngagai teknologi,” ku iya.
Kelimpah ari nya, peranak mega begunaka palan latih ti ukai di mengeri dikena ngurangka ungkup pejalai, kelimpah ngaga opis polis ke baru sereta ulih mutarka penanggul rama bala penyalah ti majak mayuh nyadi.
Sungai enggau entali ai di genturung pendiau ti suah ngemai penusah ampuh bah mega patut diperunding.
Ku Juanda, meseti bisi penetap 70 peratus pekereja menua tu diambi gawa di kebun besai sawit lalu ke bukai laban pemayuh tubuh pekereja menua luar tentu deka ngemai penanggul ke besai.