PRU14: Wan Junaidi bebasaka sebarang pemutus digaga ketuai parti renggat atas

KUCHING: Dato Sri Dr Wan Junaidi Tuanku Jaafar besedia ngetanka sitak Parlimen Santubong ba Pengawa Bepilih Besai Ke-14 (PRU14) ila.

Penyandang lima penggal nya ti mega Menteri Pengeraja Asal enggau Rampa Menua madahka diri agi ulih gawaka rayat enti dichalunka baru.

Tang ku iya, pemutus nya bepanggai ba Menteri Besai enggau Kepala Menteri sereta iya deka nitihka nama pemutus ke digaga ketuai parti renggat atas.

“Aku ulih nerima penemu ba pekara tu lalu aku berengkah ari ke dipilih nyadi chalun nyentukka seharitu tetap nitihka nama utai ku ketuai pemadu tinggi dalam parti enggau perintah.

“Nya alai enti ketuai ba renggat nengeri enggau Menteri Besai setuju aku dichalunka, aku deka bediri minta pilih baru,” ku iya.

Iya mansutka penemu iya dalam aum pengarang berita pengudah nyuaka geran projek mit menua pesisir (MRP) ungkup Parlimen Santubong ba Dewan Serbaguna, Pusat Khidmat Parlimen Santubong, Jalan Kulas ditu, ensanus.

Bisi 71 bengkah gerempung nerima geran nya enggau penyampau semua ungkup belanja RM247,920.

Nambahka nya Ku Wan Junaidi, kenyau ari ngarika sitak Santubong ba taun 2014, mayuh servis enggau pemansang ke udah dibai iya sereta ngelui ari ke dipelaba.

Ku iya, iya nadai penanggul enggau sebarang bida jalai pengarap ba sitak ke diarika iya ke alai ungkup belanja diberi enggau enda bechiping ngagai semua masjid, surau, gereja sereta tokong.

Dalam opis menteri, iya menteri keterubah ke ngatur pengerami Gawai ba renggat opis menteri sereta pengerami keamatan.

“Dalam opis menteri aku bisi 700 iku pengereja pengawa ari Sarawak enggau Sabah lalu aku nentuka pengelantang pendiau sida dijaga.

“Opis menteri tu mega udah ngatur pengerami Tahun Baru China ti keterubah iya pengudah aku nyadi megai opis menteri tu enggau tu ila kami deka ngatur pengerami Deepavali,” ku iya.

BA PRU13 taun 2013, Wan Junaidi ngetanka sitak Santubong enggau majoriti 20,936 undi ngalahka chalun PKR, Zulrusdi Mohd Hol,chalun ngatika diri Affandi Jemanenggau chalun STAR, Mura Kadir.