Anang bemainka sentimen etnosentrik lebuh bekimpin

KUALA LUMPUR: Parti politik dipinta meri pemerat ba isu menua enggau nasional lalu ukai semina bemainka sentimen etnosentrik iya nya ngumbai siti komuniti ngelui agi ari komuniti ke bukai di menua dalam kimpin politik sida, ku Serakup Patriot Nasional.

Presiden iya, Datuk Mohd Arshad Raji madah lebuh Malaysia baru udah ngintu kenap taun merdeka ke alai gaya ulah ti enda manah tu sereta pemambar ba politik enda patut ditejuka pia aja ngerusak pengelantang komuniti ti datai ari pupu bansa di menua tu.

“Maya Pengawa Bepilih Besai Ke-14 (PRU14) nyau majak serekat, kami beratika gaya ulah kimpin ti enda manah ari parti politik ti bekimpin bepelasarka sentimen etnosentrik. Ulah ke bansa tu enda manding, enda manah sereta tau ngasuh charut.

“Pia mega, sebarang kaban politik tauka parti politik ti bekimpin tauka sengaja ngasut ngasuh nyerara nengeri tauka wilayah deka dipejah,” ku iya ba sebengkah penerang ditu, sehari tu.

Dilanchar dalam bulan Ogos tu tadi, serakup nya datai ari raban veteran soldadu enggau polis laly batang tuju penumbuh iya dikena mantu ngempitka agi penyerakup peranak Malaysia ba semua raban etnik di menua tu.

Ku Mohd Arshad, pematut ngempitka agi penyerakup bansa beguna agi ari sebedau tu kelebih agi ba gaya ekonomi dunya ti enda tentu dudi hari.

“Kandang beberapa bulan ti deka datai, kami ngaul gempung ukai dikuasa perintah ( NGO), gempung perintah enggau parti politik ba pengawa nyapai pengelantang menua,” ku iya. — Bernama