Pengelantang raban bansa patut terus dijaga

Peranak Sarawak meseti ngetanka pengelantang ti dikemeran diatu ke pemaik raban rebak dudi

KUCHING: Patut sereta beguna endar peranak Sarawak ngenang sereta ngetanka pengelantang raban bansa ti udah meruan dikemeran ke pemaik raban rebak dudi.

Sekretari Besai Parti Rakyat Bersatu (UPP), George Lo Kuin Fah nyemetak madah taja raban bansa di Semenanjung Malaysia kurang pengelantang, tang peranak Sarawak meruan beserakup.

“Kitai di Sarawak nadai baka nya (charut), kitai ngasaika diri chukup diberekat, lalu aku ngarapka pekara tu, semua peranak Sarawak enggau Malaysia deka ulih begulai sereta berami,” ku Lo rambau bejadika Deepavali Extravaganza 2017 diatur di Plaza Merdeka kemari.

Iya mega madahka, endang patut rayat ngetanka pengelikun di Sarawak sereta enda ngemendarka orang bukai ngeruga pengelantang ti diasaika kitai.

Nangkan nya, ku iya, pengerami Deepavali kemari mujur matak penatai rayat ari semua bansa, ti nyenggala ngayanka reti penyerakup bansa ke bendar di Sarawak.

“Hari besai ti diintu kitai baka Hari Raya Aidilfitri, Gawai, Taun Baru China enggau Deepavali, nyadi hari besai ungkup semua peranak Sarawak sereta dikena peranak Malaysia begempuru,” ku Lo.

Sama bisi bejaku kemari Penyanding Penemu Gerempung Raban Nembiak Hindu Kuching (KHYO), Govinda Nair ti madahka tu Deepavali Extravaganza kedua udah diatur – keterubah dalam taun 2015 – ke alai sida ngatur begulai enggau raban UPP.

Kitai di Sarawak nadai baka nya (charut), kitai ngasaika diri chukup diberekat, lalu aku ngarapka pekara tu, semua peranak Sarawak enggau Malaysia deka ulih begulai sereta berami. George Lo Kuin Fah Sekretari Besai UPP

“Kelimpah ari berami, Deepavali mega awak dikena ngingatka raban ti kurang benasit,” ku Govinda ke mega ngemataka pengawa nyuaka pemeri (13 iku penerima) ngagai sida ti kurang benasit enggau indai tunggal, berebak enggau pengerami nya.

Bela bisi diatur bemacham aktiviti baka makai Roti Canai, Saree tying, ngaga Murukku, Uri adithal, Thoranam tying ( traditional decoration), ngaga Mehndi engga Rangoli.

Pemerindang mega bisi disengkaum dalam atur pengerami baka ari Kuching Indian Fine Arts, Kuching Dandiya Group enggau beperindang live muzic ari raban pemuzik Urumee Melam.

Sama bisi datai Presiden KHYO Kannan Muniadi sereta bala kaban bukai ari serakup nya enggau bala kaban UPP.

PROGRAM KOMUNITI: (Rintai kepenudi, ari tiga kiba) Spencer, Linggir ebgulai enggau bala kaban ke bukai ti bisi ngaul diri ba aktiviti beripai.

PENGGI NUAN: Lo (dua kiba) nyuaka pemeri ngagai siku penerima seraya dikemataka (ari kiba) Kannan, Govinda sereta bala bukai.