Perambu numbuhka sebuah sekula besai di Meluan disukung mayuh piak
JULAU: Sebuah sekula besai (sekolah pusat) dikena nampung sekula primari ke bisi di Meluan benung diperunding berindik ari timbal chukup manah ari piak bekaul ba keretas kereja nya.
Kesemua piak datai ari bala pengari ari Opis Pelajar Pelilih Julau, bala Kepala Pengajar, chairman Gerempung Apai Indai enggau Pengajar (PIBG) sereta bala kaban komiti rambau aum bejuraika keretas kereja, bela setujuka keretas kereja nya.
Kaban Kunsil Nengeri (ADUN) Meluan, Rolland Duat, ti bechairmanka aum nya ba bilik konferen Opis Pelajar Julau apin lama ke udah, meri terima kasih ngagai semua piak bekaul ti udah beratka pengawa enggau lurus ati baum sebedau ngaga sebarang pemutus.
Rolland madahka pemutus nya nyadi pemungkal dikena nyingkang ke mua nentuka bala anak sida ngasaika pelajar ti menyana dalam rampa ti kondusif agi sereta sekula baru dipelaba deka disikap ngena perengka guna moden enggau kereban belajar enggau ngajar ti nitihka kemaya hari.
Kelimpah ari nya, perambu ngadaka sekula besai (sekolah pusat) deka ngambi bala pengajar bisi penelaba ti bisi penau khas dalam subjek teras baka Matematik, Sains enggau English, ku iya nambah.
Sekula ti deka dikaul dalam pengawa ngadaka sekula besai di Kelang, SK Nanga Merurun, SK Nanga Meluan iya nya SK Nanga Entabai, SK Tapang Punggu enggau SK Lubok Assam.
Berindik aria um nya, iya deka nganjung keretas kereja ngagai Opis Menteri Pelajar ngambika atur patut dipejalai, ku Rolland, seraya nambah, iya deka ngansak projek nya dipejalai enggau jampat.
“Aku pechayaka perambu sekula besai tu deka ngemai pangka positif kelebih agi ba pengawa nyediaka pelajar ti menyana ngagai bala nembiak di sekula menua ulu ti suntuk ari semua pekara.
Sekeda bala ke bisi datai baum pemesai ari Opis Pelajar Pelilih Julau, Dali Rain.