Raban nembiak Bumiputera agi kurang ngambi bidang akauntan
KUCHING: Menteri Muda Nembiak enggau Lumba Datuk Snowdan Lawan deka meda mayuh agi graduet akauntan Bumiputera ditempa di nengeri tu.
Nitih statistik pemadu baru ari Institut Akauntan Malaysia (MIA), ku iya, semina 23 iku ari 1,411 sida ti belajar tauka 2.4 peratus aja graduet akauntan di Sarawak iya nya Bumiputera.
“Pengari Bumiputera dalam profesyen akaun nyadi siti ari isu ti patut diputar.
“Dikearap pengudah tu, kitai deka bisi mayuh agi graduet Bumiputera dalam bidang akaun,” ku iya lebuhka bejaku di Majlis Graduasi Kolej Sunway Kuching Ke-22 ditu, kemari.
Taja pia,iya berasai lantang laban meda bisi penambah 10 peratus ari penyampau graduet dalam bidang akauntan kemari iya nya Bumiputera.
Berebak enggau nya, Snowdan muji pengawa Kolej Sunway mantu nempa mayuh agi akauntan Bumiputera sereta ngaul pengawa begulai enggau Yayasan Sarawak, Yayasan Peneraju Pelajar Bumiputera, Palan Pegulih Profesional Malaysia (MyPAC) enggau Yayasan Pelajar Teknikal Rayat Sarawak ( Yayasan Teras).
Tu ku iya belalauka pengawa meransang mayuh agi nembiak Bumiputera ngambi kus Juruteknik Akauntan Profesional (CAT) enggau Gerempung Akauntan Profesional Berkanun (ACCA).
Iya nyemetak madahka Malaysia patut nempa mayuh agi akauntan ti disikap ngena pengelandik dikena nangkup peminta ekonomi belalauka penemu enggau digital ngambika nyadi menua industri.
“Kurang ari 30 taun ti udah, enda mayuh orang rindu sereta ngelala peminta digital ba tebal agi pengawa dagang ti chukup bebida kemaya hari tu.
“Suba kitai beranakka puku dikena meli dua buah komputer, udah dikumbai mar lalu semina dikena pekereja ngemasukka penerang.
“Dokumen enggau penerang dirikod chara fizikal dataika jeman digital ke alai kerani deka ngemasukka penerang ngambika disimpan ke dalam diske diatu mega udah dikumbai tinggal,” ku iya.
Nisbah ngagai menua baka Australia, United Kingdom, Hong Kong enggau Singapore iya nya urung 100 iku akauntan ari penyampau peranak ti ditempa dibanding nisbah Malaysia siku ari 1,000 iku.
“Sekeda pansik udah dipejalai Serakup Besai Akauntan Antarabangsa (IFAC) ngaku akauntan mansutka penatai penyampau RM4.3 trilion setaun ari segi makit sida ngagai komuniti.
“Kebendar, Malaysiaendang agi tubah begunaka mayuh agi akauntan,” tandu iya.
Berebak enggau pengawa sehari nya, bisi 80 iku nembiak ti ngambi pelajar ACCA, OBU, CAT enggau DIA ari Kolej Sunway Kuching udah nerima skrol degree sida.
Ketuai Pemesai Eksekutif Kolej Sunway Kuching Joseph Lim mega dipadah bisi mansutka jaku, 80 iku nembiak ti udah mujur nembika pelajar sida dalam bulan Disember 2016 enggau Jun 2017.
“Bala nembiak tu udah ngambi peresa baka ACCA, OBU, CAT enggau DIA laban iya begunaka keretas kereja, pengiruh, pengangkun enggau komitmen.
“Di Kolej Sunway Kuching mega, piak kami keran nentuka kus DIA enggau DIBM (Diploma Pengurusan Perniagaan) seruran bisi dipejalai ngambika ulih besemekih enggau kus diploma ke bukai enggau nempa nembiak kami bisi penau profesional Persatuan Pemegang Akaun Antarabangsa (IAB) enggau diploma sida,” ku iya.
Nya alai, Kolej Sunway Kuching ngemeratka pengawa ngetanka penuduk iya nyadi penyedia besai program ACCA enggau CAT di Sarawak.
Berengkah diterit ari September taun baru, ku iya ACCA deka bisi ubah ngenyit ba kurikulum pelajar sida.
Bala nembiak deka dikelala enggau keretas baru baka Pemimpin Perniagaan Strategik - keretas peresa empat jam ti mansik pelajar bekaul enggau pengelandik enggau penemu pemun ti besai agi ti deka nyediaka sida mangku pengawa nyadi Ketuai Pemesai Wang enggau Ketuai Pemesai Eksekutif dalam organisasyen.