Perintah seruran nentuka rayat ngasaika pengelantang
Perintah enda nejuka rayat napi pemar tang bebendar ngiga chara mutarka penanggul, ku Ahmad Lai
MIRI: Perintah nadai kala nejuka rayat napi pemar nyengkaum penusah ngenyit enggau nadai meri bantu sereta ngelanggur chara mutarka iya.
Kaban Parlimen ( MP) Sibuti Datuk Ahmad Lai Bujang madah, penanggul rayat seruran nerima perati ari perintah ti gawa nengah ejensi-ejensi ke bisi di menua sida.
“Perintah nadai kala enda ingatka rayat, nejuka rayat pia aja, mutarka penanggul kediri aja,” ku iya nyemetak madah lebuhka dirandau kemari.
Iya ngelansa pasal jaku ansak Parti Islam SeMalaysia (PAS) minta perintah enggau pengari rayat suah agi ngabas sereta mutarka penanggul ampuh bah di Sibuti.
Kemari, PAS Sibuti dekaka perintah ngemanahka stuktur parit ke bisi di genturung pendiau enggau rumah panjai dikena nyeliahka ai bah ari sungai Tiris ti suah nyadi maya musim landas.
Enam genturung pendiau ke bisi di semanjai sungai Tiris iya nya Kampung Pintasan, Kampung Masjid, Kampung Kepayang, Kampung Tunah, Kampung Sebalik enggau Kampung Lubok Bunih lalu penyampau tubuh peranak dia ngelui ari 1,000 iku.
Bisi mega sebuah rumah panjai iya nya Rumah Albion ke mega dientak besemak enggau sungai nya.
Ku Ahmad Lai ke mega Menteri Pengeraja Asal enggau Rampa Menua madah, Datuk Dr Wan Junaidi Tuanku Jaafar udah dibai ngagai Sibuti ngambika meda empu penusah ampuh bah enggau tanah tusur.
“Diatu iya (Wan Junaidi) berunding enggau Menteri Besai ngambi nambahka belanja dikena mutarka penanggul bah. Ukai semina ungkup Sibuti aja, tang mega serata Sarawak,” ku iya nerang.
Senentang penanggul ba parit, ku Ahmad Lai, ti suah dibai ngagai perati Opis Parit enggau Entali Ai (JPS) nentuka arus ai lanchar lalu gaya parit enda sebat dikena nyeliahka penusah bah tunggal.
“Tetiap tumpuk pendiau enggau rumah panjai mega diagihka belanja dikena ng- atur pengawa beripai ngelasi parit lalu nentuka parit enda repa,” ku iya nerang.
Maya musim bah datai, piak bekuasa suah ngingatka peranak dia bejejimat sereta nyaga pengelikun diri.
Ahmad Lai mega bisi berandau enggau Ketuai Komuniti Kampung Pintasan, Jalil Karim, nanyaka penerang pemadu baru pasal ampuh bah.
Kemari, tiga genturung pendiau iya nya Kampung Pintasan ke bisi 348 rumah, Kampung Lubok Bunih (200 rumah) enggau Kampung Masjid (90 rumah) dituntung ampuh bah tunggal berindik ari ai pasang raya ari sungai Tiris.
Ampuh bah nyadi dua kali berengkah ari Hari Lima ketegal ujan bangat, nyauka tiga jam.
Ai bah jampat surut tang tikas peninggi ai niki laban ujan bangat ti enda ngetu.
“Di Lubok Bunih, peninggi ai diripot datai ba tikas punggung orang besai tuai, seraya di kpg Masjid naka pala patung,” ku iya lebuhka dirandau kemari.
Ku Jalil, timpuh pemadu lama bah surut iya nya pengelama empat hari.
Taja suah dituntung penusah ampuh bah, peranak enda betapi enggau penanggul jalai tepekul laban penanggul semina nyadi ba kandang tanah baruh.
Perintah nadai kala enda ingatka rayat, nejuka rayat pia aja, mutarka penanggul kediri aja. Datuk Ahmad Lai Bujang MP Sibuti