158 lot tanah di Kampung Seberang udah diberi surat pala tanah
SRI AMAN: Bisi 158 lot tanah di Kampung Seberang, Sri Aman udah dikeluar surat pala tanah lalu bisi 72 lot agi ke bedau dikeluar pala tanah naka diatu.
Menijar Besai Wilayah FELCRA Berhad Sarawak Rasidi Ahmad madah, 72 lot tanah ti bedau dikeluar pala tanah deka dipejalai piak pengatur pengawa begulai enggau piak Penguasa Tanah enggau Survey ditu.
“Berindik ari nya, kitai ngarapka piak Penguasa Tanah enggau Survey ulih mantu ngenyampatka agi atur pengawa ngeluarka pala tanah ngambi bala pesereta ti bekaul muntang agi nerima pemaik ari bayar dividen ti deka datai,” ku iya lebuh bejadika Aum Besai Komiti Pemansang Projek FELCRA Berhad, Kampung Seberang, Sri Aman bertempat di Balai Masjid Bandar Sri Aman, semak ditu, pagi ensanus.
Ku iya, Komiti Pemansang Projek (JKKP) Kampung Seberang nyadi sebengkah komiti pesereta ti diarika bala pesereta Projek FELCRA Berhad, Kampung Seberang.
“JKKP tu bejalaika pangku pengawa besai dalam kaul FELCRA Berhad enggau bala pesereta FELCRA Berhad ditu,” ku iya nerang.
Berindik ari nya ku iya, pemisi pangku pengawa ti dipadu ari bala kaban iya deka mantu ngenegapka agi kaul piak pengatur pengawa enggau pesereta projek dia,” ku iya.
Projek FELCRA Berhad di Kampung Seberang tu udah dibuka dalam taun 2010 enggau pemesai ukur kelingi 183 hektar lalu endur betanam 161.06 hektar pemesai.
Projek tu udah mansutka asil dalam taun 2013 ti ngaul 230 lot tanah dikemansang ke alai 158 lot udah bisi geran seraya 72 lot ke bukai bedau ngembuan geran.
Kelimpah ari nya, projek tu mega ngaum 222 iku pesereta ti udah nyain sempekat enggau pemesai tanah pesereta ti udah disain mungkur 82.5485 hektar tanah.
Sama bisi datai, Menijar Kandang Menua FELCRA Berhad Betong, Abu Kassim.
Aum tu udah digulu 162 iku pesereta ari Kampung Hilir, Kapung Ulu, Kampung Lingga enggau Kampung Muhibbah, Sri Aman.