Komuniti menua pesisir meseti meri kerejasama rat ngagai perintah
SRI AMAN: Komuniti menua pesisir di nengeri tu diperansang seruran meri kerejasama rat ngagai perintah dikena ngemuntangka perintah bejalaika mayuh macham projek pemansang ti pulaika pemaik begulai.
Menteri Muda Pengelantang Komuniti Sarawak, Datuk Francis Harden Hollis madah enti nadai kerejasama rat ari rayat, perintah mar deka bejalaika pemansang lalu tu deka pulaika pengerugi ukai semina ngagai perintah aja, tang mega rayat.
“Nyadi raban ti bejalaika pemansang, perintah minta semua peranak kelebih agi di menua pesisir meri sukung nadai bebagi nentuka pemansang seruran bisi dipejalai,” ku iya.
Harden ke mega Kaban Kunsil Nengeri (ADUN) Simanggang mansutka jaku nya nengah teks ti dibacha pengari iya, Kausilor Waterkiller James Junit, rambau bejadika Program Pemesai Begulai Enggau Rayat diatur begulai Komiti Pemansang enggau Pengelikun Genturung Pendiau (JKKK) Rumah Charli Ata, Pruan ‘A’, Opis Bomba enggau Penyah Penusah Bagi Menua Sri Aman enggau Opis Pemansang Mensia Mayuh (KEMAS) Bagi Menua Sri Aman semak ditu, apin lama ke udah.
Ku iya, perintah seruran ngemeratka pemansang rayat nadai ngira dini alai komuniti nya diau, sekalika di mengeri tauka menua pesisir, nentuka tetiap serak komuniti bela ulih ngasaika asil ari merdeka.
“Perintah endang nadai kala enda ibuhka sekeda menua di nengeri tu lalu semua rayat nadai ngira bansa, jalai pengarap enggau dini sida diau ngambi ulih ngasaika pemansang ti deka, benung enggau iya ke udah dipejalai pulaika pemaik begulai,” ku iya.
Ku iya, sukung tegap ngagai tetiap pengari rayat di menua sida empu beguna endar laban iya deka ngemuntangka pejalai pemansang sereta ulih nyungkak pengerembai ekonomi di menua nya.
Nampung jaku iya, ku Harden, endang patut komuniti menua pesisir ngubah gaya runding laban tebal agi sida agi ngemeranka runding chara lama lalu tu nekul sida ari berubah, ngangkatka tikas pengidup enggau ekonomi diri.
“Gaya pejalai pengidup diatu bebida endar enggau gaya pengidup ke suba, nya alai, ka tauka enggai, kitai meseti berubah seriris enggau pengerembai kemaya hari ngambika kitai ulih bediri sama tinggi lalu duduk sama baruh enggau komuniti bukai ti dulu agi ngasaika pemansang,” ku iya nyemetak madah, seraya nambah, semua tu pulaika pengelantang diri empu enggau sida sebilik.
Sama bisi datai rambau program nya Pemesai Kanan Bomba II, Opis Bomba enggau Penyah Penusah Bagi Menua Sri Aman, Jilin Itar, Pemantu Pemansang Komuniti di Opis KEMAS Sri Aman, Kelvin Lambai, pengari Pemesai Pengintu Pengelantang Sri Aman, Ishamuddin Kiprawi, Pemancha Micheal John Sanggop, Penghulu Joseph Lichong sereta bala bukai.
Berebak enggau nya Harden mega bisi ngemendarka agih belanja nengah pengari iya penyampau RM5,000 lalu iya mega bisi ngemendar sereta deka melanja Pengerami Mantar Gawai 2018 diatur Parti Sa’ati Rayat Sarawak ( SUPP) Pampang Lingga bepalan di Rumah Charli Ata, Kampung Pruan ‘A’ tu, dalam taun baru.