Bisi 39,657 chalun ari Sarawak benung napi peresa Pentaksiran Tingkatan Tiga

KUCHING: Hari keterubah peresa Pentaksiran Tingkatan Tiga (PT3) ke berengkah kemari bejalai enggau lanchar lalu urung 39,657 iku chalun di serata nengeri benung napi peresa nya.

Direktor Opis Pelajar Negeri Sarawak Rakayah Madon madah 201 palan peresa PT3 dibuka di serata Sarawak.

Ku iya, ari semua penyampau chalun nya, 38,237 chalun ari Sekula Sekundari perintah enggau bantu perintah.

“Ungkup sekula pribit bisi 1,173 iku, chalun ngatika diri 13 iku, sekula ke dikuasa ijinsi perintah kelimpah ari Opis Menteri Pelajar bisi 220 chalun sereta 14 iku chalun ari sekula Opis Menteri Dalam Nengeri enggau Opis Menteri Pengintu Pengelantang, Pemansang Orang Indu enggau Komuniti.

“Peresa PT3 tu chukup berat ketegal meri awak kitai nemu ikas pemereti nembiak ba pekara pelajar sebedau sida nyingkang ngagai renggat ke tinggi agi,” ku iya lebuh dikerandau kemari.

Ngenang sentang palan peresa ke dibuka, Rakayah madah 182 ari penyampau 201 palan peresa nya ngarika sekula perintah.

“Sekula pribit bisi 13 iti palan peresa dibuka, Maktab Rendah Sains Mara (MRSM) bisi tiga palan enggau ke bukai nya sekula ‘akhlak’,” ku iya.

Tinjau Utusan Borneo di Sekolah Menengah Kebangsaan (SMK) Kota Samarahan kemari mandangka semua 401 chalun datai ngambi peresa nya.

Kepala Pengajar SMK Kota Samarahan Bujang Awang Jamain lebuh dikerandau madah semua chalun nya ngarika nembiak pom 3 enggau chalun ari luar.

“Ngarapka semua chalun PT3 ulih nyaut tanya enggau manah lalu nembuka semua keretas peresa tu,” ku iya.

NYIKAP DIRI: Chalun Pentaksiran Tingkatan Tiga ari SMK Kota Samarahan sempat macha bup sebedau tama ke bilik peresa.

Pemesai Pelilih Lundu, Awang Putrayusrie ngelepaska tanglung nyerumba pengawa ngatur Pesta Sematan 2017.