Nyaga pengelikun nembiak pengawa ke chukup berat
SARIKEI: Pengawa nyaga pengelikun nembiak mit nyengkaum pengawa nagang, nyeliah tauka ngetanka raban tu ari dikeruga sida ti ngereja penyalah.
Kaban Kunsil Nengeri (ADUN) Meradong, Ding Kuong Hiing madah, bungkur pengawa mega nyengkaum enda dikeibuh, nyamah, ulah ti kasar enggau eksploitasyen ari batang tubuh, seksual sereta mega runding.
“Ari pekara tu, kitai ulih meda sereta beratika pengawa nyaga pengelikun nembiak mit nyengkaum bungkur pengawa ti chukup berat.
“Nadai pengawa, langgur, ngaga polisi, undang-udang tauka akta sereta pejalai enggau pengawa neritka undangundang ti ngaul semua ejensi perintah sereta saup ari semua serak komuniti, juluk nyaga pengelikun nembiak mit ari bemacham keruga enda deka muntang dijapai.
“Nya alai, dikena nyapai Polisin Nyaga Pengelikun Nembiak Mit Nasional, komitmen semua piak ba pengawa tu patut ditambah enggau nyadika iya siti tanggungpengawa begulai,” ku Ding.
Iya mansutka jaku nya rambau Program Komuniti Penyiru: Seminar Nyaga Pengelikun Nembiak Mit ti udah diatur di sebengkah hotel ditu, kilah ensana.
Seminar tu udah digulu 88 iku pesereta datai ari bala apai indai enggau mega komuniti diau besemak.
Nitih ku Ding, nengah pengawa ngatur seminar ke bansa tu, iya deka meri penerang nyentuk agi ngagai bala komuniti bekaul pekara nyaga pengelikun nembiak mit sereta ngaul kerejasama strategik enggau komuniti ba pengawa mutarka ulah ti kasar ngagai raban tu.
Pia mega ku Ding nambah, nyaga pengelikun nembiak mit ukai semina telempai ba ejensi perintah aja tang ngaul semua komuniti.
“Enti kitai bejaku pasal pengawa nyaga anak ari apai apai, sida ti nyaga tauka ngibun, tu nyadi siti pangku pengawa ti besai endar sereta mega berat.
“Nya alai, pengawa nyaga pengelikun nembiak mit endang nyadi tanggungpengawa tauka pangku pengawa ti mar enggau pedis dikereja sereta begunaka kerejasama semua piak,” ku Ding nandu nyemetak.
Ba lansa bukai, Pemesai Ngintu Pengelantang Komuniti Bagi Menua Sarikei, Tang Kee Lee, dalam jaku pengelalu iya rambau atur seminar nya madah, program tu diatur dikena meri penyedar ngagai mensia mayuh pemesai guna meri pengelikun ngagai raban nya.
“Dikearap nengah atur seminar ke bansa tu deka ulih ngurangka penusah enggau mega kes nyamah ti ngaul raban nembiak mit,” ku Tang.
Sama bisi datai pengari Residen Bagi Menua Sarikei, Henry Gimong Sawat, Ketuai Pampang Pengawa Nyaga Pengelikun Nembiak Mit Opis Pengintu Pengelantang Komuniti Sarawak, Umadi Polot, pengari Pemesai Pelilih Sarikei, Jahana Yusuf sereta bala ketuai raban bansa ke bukai.