TM enda setuju ke perambu kemisi penggal sekula 2018
MIRI: Sebengkah Gerempung Ukai Dikuasa Perintah ( NGO) iya nya Terabai Menua (TM) mega enda puas ati sereta mantah perambu kemisi penggal sekula 2018.
Enda baka selama, perambu kemisi penggal sekula ungkup 2018 ti dikeluarka Opis Menteri Pelajar apin lama ke udah, lalu udah dikunsi ba media rama, dipeda nadai agi netapka kemisi tengan taun berengkah ari pun bulan Jun.
“Tang nya berengkah ari minggu kedua bulan Jun iya nya ari 9 nyentuk 24 Jun 2018 lalu TM beratika tu pekara ti enda patut nyadi,” pia ku presiden TM, Mark Jenggo ba penerang iya ditu, kemari.
Ari gaya perambu kemisi nya baka ngelaungka hari besai Gawai Dayak ti diintu kena 1 enggau 2 Jun (Hari Lima enggau Hari Enam) di Sarawak.
“Baka nadai kemisi hari besai laban pengerami nya labuh ujung minggu, taja Gawai Dayak di Sarawak nyadi hari besai ti diintu majoriti peranak nengeri tu.
“Netapka kemisi sekula berengkah ari 9 Jun deka ngasuh apai indai ti ngintu Gawai Dayak napi pemar ba atur kemisi bala anak sida laban agi ba hari besekula.
“Tang kemisi berengkah udah tembu ngintu Gawai, nya alai TM beratika pekara tu enda entu ibuhka hari besai diintu bansa pemadu mayuh di nengeri tu ke bisi dalam kalinda hari besai Malaysia,” ku Mark nampung.
Pekara tu deka ngasuh apai indai bansa Dayak ti bekereja di luar Sarawak ti deka mulaika diri ke menua ngintu Gawai Dayak napi pemar laban maya hari bulan nya bala anak sida agi besekula.
Ku iya, nyema perintah ngelaungka kemisi Gawai Dayak baka ti udah dikeluar, TM ti ngarika semua bansa Dayak endang mantah.
Kebuah pia ku Mark, Gawai Dayak nyadi batang pengera- mi diintu bansa Dayak lalu pengawa ngelanjarka kemisi tengan taun ti nitihka pematut pun bulan Jun, dilanjar ngagai minggu kedua bulan nya, endang ngasuh bansa Dayak balat nyima.
Berindik ari nya ku iya, TM ngarapka perambu kemisi ti dikerembai di media rama ukai perambu ti betul lalu minta perintah patut nemu agi sereta berundingka kemisi hari besai baka taun-taun ke udah.
“Besai endar pengandal kami ngambika hari bulan nya ulih diperundingka baru sebedau perambu kemisi ti betul dikeluar,” ku iya nyimpul.